سەرۆكوەزیرانی هەرێمی كوردستان، نێچیرڤان بارزانی، پێشنیوەڕۆی ئەمڕۆ پێنجشەممە 26/7/2018 پێشوازی لە كچە چالاكڤانی دیاری كورد و داكۆكیكار لە مافی پەنابەرانی سووریا لە دەرەوەی وڵات، خاتوو نووژین مستەفا كرد.

لە دیدارێكدا، خاتوو نووژین وێڕای دەربڕینی خۆشحاڵی بە دیداری بەڕێزیان، پوختەیەكی دەربارەی كار و چالاكییەكانی بۆ داكۆكیكردن لە مافەكانی پەنابەرانی سووریا لە دەرەوەی وڵات پێشكەش كرد و، هیوای خواست حكوومەتی هەرێمی كوردستان و سەرۆكوەزیران پشتیوان و هاوكاری كار و چالاكییەكانی بن، بە تایبەتی كە بەنیازە بۆ خزمەتی زیاتر ڕێكخراوێكی كۆكردنەوەی كۆمەك و هاوكاری بۆ پەنابەران دابمەزرێنێت.

لای خۆیەوە، نێچیرڤان بارزانی وێڕای دەستخۆشی لە خاتوو نووژین، پشتگیریی خۆی بۆ سەرخستنی كار و چالاكییەكانی نیشان دا و هیوای خواست لەسەر ئاستی نێودەوڵەتی و هەرێمی بەردەوام بێت تاكو بە بێ جیاوازی ببێتە دەنگی هەموو پێكهاتەكانی سووریا، بەو هیوایەی دۆخی ئەوێ ئاسایی ببێتەوە و هەموو پەنابەران بتوانن بگەڕێنەوە سەر ماڵ و حاڵی خۆیان و دەست بە ژیانێكی ئاسایی بكەنەوە.

خاتوو نووژین مستەفا كە خاوەن پێداویستیی تایبەتە،‌ خەڵكی كۆبانییە و بە مەبەستی بەشداریكردن لە پڕۆگرامی تێدێكس نیشتمان لە هەولێر، سەردانی هەرێمی كوردستانی كردووە.

kdp-