کاندیدکردنەوەی چەند پەرلەمانتارێک کێشەیەکی نوێ لەناوخۆی یەکێتی درووست دەکا
بەپێی ئەو زانیارییانەی دەست کەوتووە، یەکێتی ژمارەیەک پەرلەمانتاری خولی چوارەمی پەرلەمانی کوردستانی بۆ ھەڵبژاردنی پەرلەمانی کوردستان کاندید کردووەتەوە و بەو هۆیەشەوە لەنێو ڕێکخستنەکانی حزبەکەدا، بە تایبەتیش لەنێو ئەوانەی کە بەنیازبوون کاندید بکرێن، ناڕەزاییەکی زۆر دروست بووە و کێشەی لێ کەوتووەتەوە.
لەمبارەیەوە د. بڕیار ڕەشید، گوتەبێژی دەزگای ھەڵبژاردنی یەکێتیی نیشتمانیی کوردستان، ڕایگەیاند: "ناوی لیستی یەکێتی لە ١٠٠ کاندید پێکھاتووە و بەپێی یاسای ھەڵبژارن، لە ٣٠%ی کاندیدەکانمان ئافرەتن، بێگومان ئێستا ناوی لیستی کاندیدەکانمان ئامادە کردووە و لەکاتی دیاریکراوی خۆیدا ناوی لیسەکەمان پێشکەشی کۆمسیۆنی باڵای ھەڵبژاردن و ڕاپرسی دەکەین“.
ئەوەشی پشتڕاست کردەوە کە یەکێتی چەند پەرلەمانتارێکی خولی چوارەمی جارێکی دیکە کاندید کراونەتەوە، چونکە ”کاندیدی وامان ھەیە خەڵکی لێی ڕازی بووە و بەپێی یاسا مافی ئەوەی ھەیە خۆی کاندید بکاتەوە“.
ئەمە لە کاتێکدایە کە یەکێتی هەر لە نێو باڵەکانی خۆیدا و پێش کێشەی کاندیدەکان، دەیان کێشەی دیکەی کەڵەکەبووی هەیە کە دۆخی حزبەکەیان بە ئاستێک گەیاندووە، تەنانەت ناتوانن بڕیار لەسەر بەستنی کۆنگرەکەشیان بدەن.
باسنیوز
