لە یەكێك لە بازگەكانی دووز خورماتوو، دوو پێشمەرگە لەلایەن ژمارەیەك چەكداری ھێزەكانی عێراق، لەسەر ئاڵای كوردستان ئەشكەنجە دەدرێن.

لە گەرمیان، لە زاری محەمەد فایق، بەرپرسی پێشووی راگەیاندنی قایمقامیەتی دووز راگەیاند: "شەوی رابردوو 2018/7/20 دوو پێشمەرگه ی هێزەکانی پشتیووانی 2 به ناوەکانی ( م . ي . ح ) له دایكبووی 1981 و ( ف . ص . ق) له دایكبووی 1990، لەلایەن چەكدارانی ھێزەكانی بەرپەرچدانەوەی خێرا ئەشكەنجە دراون".

روونیكردەوە: "رووداوەكە لەو كاتە روویداوە كە ئەو پێشمەرگانە بە خاڵی پشكنین دا تێدەپەڕن داوای ناسنامەیان لێدەكرێت و ئەوانیش ناسنامەی پێشمەرگەیان پێدەدەن، لەوكاتەدا یەكێك لە چەكداراەكانی خاڵی پشكنین سوكایەتی بە ئاڵای كوردستان دەكات كە لەسەر ناسنامەكە ھەیە و گوتوویەتی ئەوە ئاڵای وڵاتی میسرە. یەكێك لەو پێشمەرگانەش دەڵێت، نەخێر ئەوە ئاڵای كوردستانە. ئەو ساتە دەبێتە دەمەقاڵەیان و جنێو بە پێشمەرگەكان دەدەن و ئەشكەنجەیان دەدەن".
k24-