فیدراسیۆنی پەنابەرانی هەرێمی کوردستان ناوی ئەو پەنابەرە کوردانەی بڵاوکردەوە کە لە گرتووخانەکانی تورکیادان و رایدەگەیەنێت، لە داهاتوویەکی نزیکدا ڕەوانەی عێراق دەکرێنەوە.



ئاری جەلال، سەرپەرشتیاری گشتی فیدراسیۆنی پەنابەرانی هەرێمی کوردستان راگەیاند: "لیستەکە لە ناوی ٥٥ پەنابەر پێکهاتووە و لە ئێستادا لە گرتووخانەکانی تورکیادا زیندانی کراون".



ئاشکراشیکرد، فیدراسیۆنی پەنابەران بە هاوکاریی دەزگای کۆچ و کۆچبەرانی تورکیا و باڵیۆزخانەی عێراق، کاروباری یاسایی بۆ تەواو کردوون و لە داهاتوویەکی نزیکدا ڕەوانەی عێراق دەکرێنەوە.



سەرپەرشتیاری فیدراسێۆنی پەنابەرانی هەرێم گوتیشی: "بەشێک لەم پەنابەرانە چەند مانگێکە لە گرتووخانەکانی تورکیادا زیندانی کراون و ڕوبەڕووی بارێکی ناهەموار بوونەتەوە و لە بارودۆخێکی خراپدا بوون، ئێستاش فیدراسیۆنی پەنابەران مامەڵەی یاسایی بۆ تەواو کردوون و دەگەڕێنرێنەوە".

bas news-