نوونه‌را ئایینێ زه‌ره‌ده‌شتیان ل وه‌زاره‌تا ئه‌وقاف و كارۆبارێن ئایینى ل هه‌رێما كوردستانێ راگه‌هاند كو ل مه‌ها هه‌شت یا ئه‌ڤ ساله‌ دێ بۆ ئێكه‌م جار جڤاتا زه‌ره‌ده‌شتیان ل دهۆكێ هێته‌ دامه‌زراندن.

ئاوات حوسامه‌دین، نوونه‌را ئایینێ زه‌ره‌ده‌شتیان ل وه‌زاره‌تا ئه‌وقاف و كارۆبارێن ئایینى ل هه‌رێما كوردستانێ دیار كر، مه‌ جڤاتا خوه‌ یا ئایینێ زه‌ره‌ده‌شتى ل پارێزگه‌ها دهۆكێ هه‌یه‌، به‌لێ مه‌ باره‌گا نه‌بوویه‌ و ب شێوه‌یه‌كێ فه‌رمى نه‌بوویه‌، به‌لێ ل مه‌ها هه‌شت یا بهێت یا ئه‌ڤ ساله‌ یا 2018 باره‌گایێ ئایینێ زه‌ره‌ده‌شتى یێ ئێزدیان ب فه‌رمى دێ ل پارێزگه‌ها دهۆكێ د رێوره‌سمێن هه‌ژى دا هێته‌ ڤه‌كرن.

ئاوات ئاماژه‌ دا وێ چه‌ندێ، به‌رى نها ئه‌و خه‌لكێ دڤیا بچیته‌ دناڤ ئایینێ زه‌ره‌ده‌شتیان دا دترسیان خوه‌ ئاشكرا بكه‌ن، به‌لێ نها ئه‌و ترسه‌ نه‌مایه‌ و خه‌لك ب شێوه‌یه‌كێ ئاشكرا دهێنه‌ دناڤ ئایینێ باب و باپیران دا و یا بوویه‌ تشته‌كێ نۆرمال و گۆتژى: هه‌تا نۆكه‌ پتر ژ 300 هزار كه‌سان ڤه‌گه‌ریاینه‌ دناڤ ئاینێ زه‌ره‌ده‌شتى دا.

نوونه‌را ئایینێ زه‌ره‌ده‌شتیان ئاشكرا كر كو هنده‌ك خه‌لك ل دهۆكێ هه‌یه‌ هاتینه‌ دناڤ ئایینێ زه‌ره‌ده‌شتى دا، به‌لێ ژ به‌ر شه‌رما جڤاكێ نه‌شێن ب فه‌رمى رایا خوه‌ ئاشكرا بكه‌ن و ب ڤه‌كرنا باره‌گایێ مه‌ ل دهۆكێ، ره‌نگه‌ ئه‌ڤ شه‌رمه‌ بشكێت و گۆت: مه‌ چاڤ ل هندێ یه‌ په‌رستگه‌هێن مه‌ ب شێوه‌یه‌كێ فه‌رمى و ئاشكرا ل هه‌موو پارێزگه‌هێن هه‌رێمێ بهێنه‌ ڤه‌كرن.










باسنيوز