لە شاری هەولێر، پرۆسەی هەژمارکردنەوەی ئەنجامی هەڵبژاردنەکانی ١٢ی ئایاری رابردوو بە دەست بەڕێوە دەچێت.

لە بەیانیی ئەمڕۆ پێنجشەممەوە ١٢ی تەمووزی ٢٠١٨، پرۆسەی جیاکردنەوەی دەستیی دەنگەکان لە پارێزگای هەولێر دەستی پێ کردووە و بۆ ئەم مەبەستەش، ١٢٠ کارمەندی کۆمسیۆن کارەکان ئەنجام دەدەن.

نزیکەی ٣٠ سندووق تاوەکوو ئێستا ژماردنەوەی دەستییان بۆ کراوە و ئەنجامەکانیان هەڵواسراوە. بۆ ئەو مەبەستەش نوێنەرانی (پارتی، یەکێتی، نەوەی نوێ و ڕێکخراوەکانی کۆمەڵگەی مەدەنی) ئامادەن.

بڕیارە پرۆسەکە تا ئێوارەی سبەی هەینی بەردەوام بێت تاوەکوو ئێستا بە شێوەیەکی گشتی ئەنجامەکان هاوشێوەی ئەنجامە راگەیاندراوەکان بوون و جیاوازییەکی کەم هەیە.

ئەمەش لە کاتێکدایە کە هەریەک لە بزووتنەوەی گۆڕان، کۆمەڵی ئیسلامیی کوردستان، یەکگرتووی ئیسلامیی کوردستان و هاوپەیمانییەکەی بەرهەم ساڵح، لە چاودێریکردنی پرۆسەی هەژمارکردنەوەی دەستیی دەنگەکان کشاونەتەوە.








باسنيوز