رێڤەبەرا گشتیا گەشەپێدان و چاڤدێریا جڤاكی ل پارێزگەها دهۆكێ‌ راگەهاند، ماوێ‌ سێ‌ سالانە پتر ژ 18 هزار مۆچەخۆرێن چاڤدێریا خێزانی مۆچەیێن خوە وەرنەگرتینە و پتریا وان ژی ژنێن بێ‌ سەمیان و بێ‌ مال و حالن.

ژیان مستەفا، رێڤەبەرا گشتیا گەشەپێدان و چاڤدێریا جڤاكی ل پارێزگەها دهۆكێ‌ ب وەكالەت دیار كر، ل دووماهیا سالا 2015 ژ ئەگەرێ‌ قەیرانا دارایی حۆكمەتا هەرێما كوردستانێ‌ مۆچەیێ‌ چاڤدێریا خێزانی بڕی و ب ڤێ‌ بریارێ‌ 18 هزار و 709 كەس ل دهۆكێ‌ مانە بێ‌ مۆچی و ژ هینگی وەرە وان مۆچەیێ‌ خوە وەرنەگرتی و گۆت: ل گەل هندێ‌ ژی 6025 كەسان خواستیە ببنە خودان مۆچەیێن چاڤدێریا خێزانی، بەلێ‌ فایلێن وان هاتینە راگرتن و هێشتا نەهاتینە وەرگرتن.

ئاشكرا ژی كر كو پتریا وان كەسێن مۆچەیێن وان هاتینە بڕین و سێ‌ سالە وەرنەگرتین ژی ژنێن بێ‌ سەمیان و بێ‌ مال و حال و هاتینە بەردان و یێن هەڤژینێن وان مرین و یێن كابانی و ژنێن دانعەمر و هەتا قوتابیێن خێزاندار ژی د ناڤدانە.

ژیان مستەفا ئاماژە دا وێ‌ چەندێ‌ كو نها ب تنێ‌ مۆچەیێ‌ كێم ئەندامان دهێتە دان و ل دهۆكێ‌ 22 هزار و 931 كێم ئەندام هاتینە تۆماركرن و مۆچەیێن خوە ل رێڤەبەریا مە وەردگرن.








باسنيوز