پرۆسەی ژماردنەوەی دەنگەکانی هەڵبژاردنی پەرلەمانی عێراق بەدەست، لە شاری هەولێر دەست پێ دەکات.



رۆژی چوارشەممە 11/7/2018، پرۆسەی ژماردنەوەی دەنگەکان بەدەست بۆ چەند سندووقێکی دەنگدان بە سەرپەرشتیی ژمارەیەک دادوەر و کۆمسیۆنی باڵای سەربەخۆی هەڵبژاردنی عێراق، لە هەولێر دەست پێ دەکات.



رۆژی دووشەممە 9/7/2018، پرۆسەی ژماردنەوەی دەنگەکان بەدەست لە چەند سندووقێکی هەڵبژاردن لە پارێزگای سلێمانی دەستی پێ کرد و رزگار ئەژی گۆران، ئەندامی ئەنجومەنی سەرکردایەتیی پارتی دیموکراتی کوردستان لە سلێمانی، رایگەیاند، بەهۆی ناشەفافی و رێگرتن لە چاودێریکردنی لایەنەکان، پارتی پرۆسەکەی بایکۆت کرد.



دوای دوو رۆژ ژماردنەوەی دەنگەکان بە دەست لە سلێمانی، ئێوارەی رۆژی سێشەممە پرۆسەکە کۆتایی هات و بەپێی گوتەی زۆربەی لایەنەکان، هیچ گۆڕانکارییەکی ئەوتۆ بەسەر ژمارەی دەنگەکانەوە نەهاتووە.



رۆژی 12/5/2018 هەڵبژاردنی پەرلەمانی عێراق لە هەرێمی کوردستان و عێراق ئەنجام درا. هەرچەندە تا ئێستا ئەنجامی کۆتایی هەڵبژاردنەکە رانەگەیەندراوە، بەڵام ئەو لایەنانەی بەپێی ئەنجامە بڵاو کراوەکان دەرنەچوون، پێیان وایە لە هەڵبژاردن و پرۆسەی جیاکردنەوەی دەنگەکان بەشێوەیەکی تۆماتیکی، ساختەکاری کراوە بەتایبەت لە پارێزگاکانی سلێمانی، کەرکووک و ئەنبار و داوای ژماردنەوەی دەنگەکانیان بەدەست، کرد.




باسنیوز