بەڕێوەبەرایەتیی پۆلیسی ھەولێر لە ڕاگەیاندراوێکی فەرمیدا ئاشکرای کرد، کە کەسێکیان دوای ئەنجامدانی سێ تاوانی دزی دەستگیر کردووە.

ئەمڕۆ سێشەممە 10/7/2018، بەڕێوەبەرایەتیی پۆلیسی ھەولێر ڕاگەیاندراوێکی لە پەیجی فەرمیی خۆی، لە تۆڕی کۆمەڵایەتیی (فەیسبووک) بڵاو کردەوە، تێیدا ڕاید ئومێد عارەب عەبدوڵا، ئەفسەری نووسینگەی نەھێشتنی تاوانی باکوور بە پۆلیسی ھەولێری ڕاگەیاندووە: "دوای ئەوەی چەندین سکاڵا تۆمار کرا سەبارەت بە شکاندنی جامی ئۆتۆمبێل و دزینی کەلوپەلی نێو ئۆتۆمبێلەکان، دەستبەجێ دۆسیەی لێکۆڵینەوەمان بۆ ئەم ڕووداوە کردەوە و توانیمان ناسنامەی تۆمەتبار ئاشکرا بکەین و لە بۆسەیەکدا دەستگیری بکەین".

باس لەوەش کراوە، کە تۆمەتبار ناوی (ئـ، ا، ح)ە و تەمەن 31 ساڵە، دوای دەستگیرکردنی دانی بە تاوانەکەیدا نا، کە جامی ئۆتۆمبێلی شکاندبوو و کەلوپەلی نێو ئۆتۆمبێلەکانی دزی بوو، کەلوپەلی دزراو بریتی بوون لە: بڕێکی زۆر پارە و مۆبایل.

ھەر لە ڕاگەیاندراوەکەدا ڕوون کراوەتەوە، کە لە بەرانبەر دادگای ھەولێر دۆسیەی لێکۆڵینەوە بۆ ئەم ڕووداوە کرایەوە، دادوەر بڕیاری داوە بە بەندکردنی تۆمەتبار بە پێی مادە 446 لە یاسای سزادان.









باسنيوز