بەهۆی کاریگەری نزمە پاڵەپەستۆی هاوین، جارێکی دیکە پلەی گەرما لە هەرێمی کوردستان بەرزدەبێتەوە.

بەپێی راگەیێندراوی بەڕێوەبەرایەتی کەشناسی و بوومەلەرزەزانی هەرێمی کوردستان، لە رۆژی دووشەممەوە پلەی گەرما رووی لە بەرزبوونەوە کردووە و دوو پلە بەرزبووەتەوە. لە رۆژی سێشەممەشەوە "یەک بۆ دوو" پلەی دیکە بەرزدەبێتەوە، بەڵام رۆژی هەینی جارێکی دیکە پلەی گەرما نزمدەبێتەوە.

بەپێی راگەیێندراوەکەی کەشناسی، لە پارێزگاکانی هەولێر، سلێمانی، دهۆک و هەڵەبجە بەرزترین پلەی گەرما لەنێوان 42 بۆ 45 دەبێت. لە سنووری کەرکووک و ئیدارەی گەرمیان لە سەرووی 45 بۆ 47 پلە دەبێت .

ئەژی چەتۆ، گوتەبێژی بەڕێوەبەرایەتی کەشناسی و بوومەلەرزەزانی هەرێمی کوردستان بە (تۆڕی میدیایی رووداو)ی راگەیاند، ئەو بەرزبوونەوە مەترسیدار نییە بەڵام باشترە هاونیشتمانییان چەند رێوشوێنێک بگرنەبەر بۆ خۆپاراستن لە گەرما.

گوتیشی "تاوەکو دەکرێت کاژێر 11:00ی پێشنیوەڕۆ تاوەکو 4:00ی ئێوارە لە ماڵ نەچنەدەرەوە، ئاو زۆربخۆنەوە، ئەو جلوبەرگانە بپۆشن، کە کاریگەرییان لەسەر کەمکردنەوەی کاریگەری تیشکی خۆر دەبێت".
rudaw -