سەرۆکێ رێکخراوا هاریکاریا کورد- ئەمریکى راگەهاند، ب هاریکاریا خەلکەکێ خوبەخش، ئەم شیایین دەڤەرێن گەشتیارى ب کێمترین پارە و باشترین شێوە پاقژ بکەین، کۆ ژیانا دەهان کەسان ژ نەخوشیێن مەترسیدار ب پارێزین، گرنگە هەر تاکە کەسەک خۆ بەرپرسیار بەرامبەر ئاخا وەلاتێ خۆ بینیت.

رێکخراوا هاریکاریا کورد- ئەمریکى دگەل زانکۆیا ئەمریکى ل دهۆکێ رابووینە ب پاقژکرنا دەڤەرێن جودا جودا ل هەرێما کوردستانێ، بلند بریفکانى، سەرۆکێ رێکخراوا هاریکاریا کورد- ئەمریکى بۆ مالپەرێ فەرمیێ پارتى دیموکراتى کوردستان گۆت:" ئەم رابووینە ب پاقژکرنا دەڤەرا دناڤبەرا هەولێر و مەسیفدا، کۆ بۆ ماوەیێ سێ سالایە ئەڤ جهە نەهاتیە رامالین ژ پاشەڤەمایێن پیساتیێ و جهەکێ نیزیکى نیشتەجێبوونا هەولاتیان بوویە".

سەرۆکێ رێکخراوا هاریکاریا کورد- ئەمریکى خویاکر:" ب هاریکاریا خەلکەکێ خوبەخش و شارەوانیا مەسیفى، ئەم شیایین دەڤەرێن گەشتیارى ب کێمترین پارە و باشترین شێوە پاقژ بکەین، کۆ ژیانا دەهان کەسان ژ نەخوشیێن مەترسیدار ب پارێزین ب تایبەت خەلکێ کویێ و مەسیف و شەقلاوە، دیسان ژینگەهەکا پاقژ دڤێ گەرمێ دا دروست بکەین".

بلند بریفکانى خویاکر:" گرنگە ئەم هەمى پێکڤە بۆ وەلاتەکێ جوان و پاقژ کار بکەین و ژیانا هەولاتیێن کوردستانێ ژ هەمى جورە ئێشیێن کوژەک رزگار بکەین و خۆ بەرپرسیار بەرامبەر ئاخا وەلاتێ خۆ بینینن، ئەڤ پرۆژە دێ یێ بەردەوام بیت بۆ هەمى دەڤەرێن کوردستانێ".

رێکخراوا هاریکاریا کورد- ئەمریکى ل سالا 2016ێ، هاتیە دامەزراندن و لسەرانسەرى هەرێما کوردستانێ دبوارێ زارۆک و پاراستنا ژینگەهێدا کار دکەت.
kdp-