پێشبینی دەکرێت، ئۆپەراسیۆنەکەی هێزە چەکدارەکانی تورکیا لە دژی پارتی کرێکارانی کوردستان (پەکەکە) لەنێو سنووری جوگرافیی دەوڵەتی عێراق کە هەرێمی کوردستانە، ناوچەکانی سنووری پارێزگای سلێمانیش بگرێتەوە و فەرماندەیەکی باڵای پێشمەرگەش هەماهەنگیی نێوان باڵێکی یەکێتی و تورکیا بۆ ئەو مەبەستە ئاشکرا دەکات.

لە حاڵەتی ئەنجامدانی ئۆپەراسیۆنی تورکیا لە دژی پەکەکە، ناوچەکانی زنجیرە چیای قەندیل لە سنووری پارێزگاکانی دهۆک و هەولێر و سلێمانی دەگرێتەوە.

لەمبارەیەوە لیوا موسا گەردی، فەرماندەی فەرماندەیی هەڵگوردی هێزی پێشمەرگەی کوردستان، ڕايگەیاند: ”زانیاریی تەواوم لەسەر ئەوە نییە کە یەکێتی ڕاستەوخۆ ھاوکاری سوپای تورکیا دەکات یان نا، بەڵام یەکێتی ئێستا دوو سێ باڵی ھەیە و پێموایە باڵێک لە باڵەکانی لەگەڵ پەکەکە بێت و باڵێکی دیکەشیان لەگەڵ سوپای تورکیایە“.

ئەوەشی نەشاردەوە کە ئۆپەراسیۆنەکەی تورکیا ”ئەگەر ئەنجام بدرێت“، سنووری ئیداریی پارێزگای هەولێر تێدەپەڕێنێت و دەگاتە سنوورەکانی پارێزگای سلێمانی کە بە ناوچەی ژێر دەسەڵاتی یەکێتی ناسراوە، ”ئەوکاتەش بۆ هەموو لایەک ئاشکرا دەبێت کە کێ هەماهەنگی لەگەڵ سوپای تورکیا دەکات و کێ نایکات؟“.

هەر لەمبارەیەوە عەلی عەونی، ئەندامی سەرکردایەتیی پارتی ڕايگەیاند: ”پێشتر یەکێتی لەسەر کێشە ناوخۆییەکانی و بۆ موزایەدەکردن سنوورەکانی بۆ پەکەکە واڵا کرد و ئەو حزبەی ھێنایە ناو قوڵایی ھەرێمی کوردستان، ئێستاش پەکەکە دەستی خستووەتە بینەقاقەی یەکێتی و لە دەوروبەری سلێمانیش داوای ناسنامە لە ئەندامانی سەرکردایەتی و کادیرانی باڵای یەکێتی دەکەن، چونکە پەکەکە قایمقام و شارەوانی بۆ خۆی داناوە و حیساب نە بۆ یەکێتی و نە بۆ حکوومەتی ھەرێمی کوردستان ناکات“.

ئەوەشی ڕوون کردەوە کە یەکێتی ئێستا هەست بەوە دەکات کە هێنانی پەکەکە بۆ سنوورەکانی خۆی زیان بە خودی یەکێتی دەگەیەنێت.











باسنيوز