بەرپرسێ‌ لقا 17 یا شنگال راگەهاند، كۆمسیۆنا بلند یا هەلبژارتنان ل عیراقێ‌ راگەهاندیە كو دێ‌ دەنگێن ئاوارێن شنگالێ‌ و ئاوارێن مووسلێ‌ ئەوێن ل هەلبژارتنێن پەرلەمانێ‌ عیراقێ‌ نەهاتینە هژمارتن، دێ‌ ب دەست هێنە هژمارتن و ئەم چاڤەرێ‌ وەرگرتنا دوو كورسیێن دی ل شنگالێ‌ دكەین.

قادر قاچاخ دیار كر، كۆمسیۆنا بلند یا هەلبژارتنان راگەهاندیە كو ئەو سندوقێن ل شنگال یێن ئاوارێن شنگالێ‌ یێن نەهاتینە هژمارەتن كو 206 سندوقێن دەنگانە و هەموو یێن ئاوارێن شنگال و ئاوارێن مووسلن دێ‌ هەموو ب دەست هێنە هژمارتن و ئەڤە ئەو دەنگن كو 75% ژ دەنگێن ئاوارێن شنگالێ‌ هاتبوونە سۆتن و نها ژ نوو بۆ ئێكەم جار دێ‌ هێنە هژمارتن.

ئاشكرا ژی كر كو ئەگەر ئەڤ دەنگە هەموو ب عەدالەت بهێنە هژمارتن، رەنگە ئەم چاڤەرێ‌ وەرگرتنا دوو كورسیێن پەرلەمانی بكەین و گۆت: ئەڤە ژی ئەگەر هات و كومسیۆنێ‌ و عیراقێ‌ چو غەدرێن دی ل مە نەكرن و ب عەدالەت دەنگێن شنگالێ‌ هەموو هاتنە هژمارتن.

خالد ئەحمەد، بەرپرسێ‌ هەلبژارتنێن پارتی دیمۆكراتی كوردستان ل پارێزگەها دهۆكێ‌ تەكەست كر كو هەموو دەنگێن ئاوارێن شنگال و مووسلێ‌ و رەنگە هندەك دەنگێن دهۆكێ‌ ژی ل گەل دا بن جارەكا دی دێ‌ ب دەست هێنە هژمارتن و گۆتیشی: ل شنگال و مووسل دێ‌ گوهۆرین پەیدابن و رەنگە پارتی ئێك هەتا دوو كورسیێن دی وەربگریت، بەلێ‌ ل پارێزگەها دهۆكێ‌ پارتی 10 كورسی ژ سەرجەمێ‌ 11 كورسیان وەرگرتینە و باوەرناكەم چو گوهۆرین ل پارێزگەه دهۆكێ‌ پەیدا ببن.












باسنيوز