نوونه‌رێ ئه‌رمه‌نان ل په‌رله‌مانێ كوردستانێ راگه‌هاند، په‌رله‌مانێ ئه‌رمینیا كورسیه‌كا تایبه‌ت بۆ كوردێن ئێزدى و كورسیه‌ك ژى بۆ كوردان و كورسیه‌ك ژى بۆ ئاشووریان ل په‌رله‌مانێ ئه‌رمینیا ته‌رخانكرن و ئێدى كورد دشێن ب دوو نوونه‌رێن خوه‌ و ئاشوورى ب نوونه‌رێ خوه‌ به‌شدارى هه‌لبژارتنێن ئه‌رمینیا ببن و كورسیێن كۆتا وه‌ربگرن.



یه‌روانت نیسان، نوونه‌رێ ئه‌رمه‌نان ل په‌رله‌مانێ كوردستانێ، دیار كر: ”وه‌كو كاردانه‌ڤه‌ بۆ وێ خزمه‌تا كوردستان بۆ ئه‌رمه‌نان ل كوردستانێ دكه‌ت بۆ هندێ په‌رله‌مانێ كوردستانێ كورسیه‌كا تایبه‌ت بۆ ئه‌رمه‌نان ل كوردستانێ ته‌رخانكریه‌، ئه‌ڤرۆ رۆژا پێنچشه‌مبى 21/6/2018، په‌رله‌مانێ ئه‌رمینیا ژى كورسیه‌كا تایبه‌ت بۆ كوردێن ئێزدى و كورسیه‌ك ژى بۆ كوردان و كورسیه‌ك بۆ ئاشووریان ل په‌رله‌مانێ ئه‌رمینیا ته‌رخانكرن و ئه‌ڤه‌ ژى دێ خزمه‌ته‌كا مه‌زن بۆ كوردێن ل ئه‌رمینیا دژین كه‌ت“.



ئاشكرا ژى كر، کو به‌رى دوو سالان من وه‌كو نوونه‌رێ ئه‌رمه‌نان ل كوردستانێ سه‌ره‌دانا ئه‌رمینیا كر و من به‌حسێ وێ خزمه‌تێ كر یا كوردستان بۆ ئه‌رمه‌نان دكه‌ت و من بۆ وان پێشنیار كر بوو كو په‌رله‌مانێ ئه‌رمینیا ژى خزمه‌ته‌كا تایبه‌ت بۆ كوردێن ل ئه‌رمینیا دژى بكه‌ن و نها وان به‌رسڤا مه‌ دایه‌ كو دێ دوو كورسیان بۆ كوردان ته‌رخان كه‌ن و بۆ هه‌لبژارتنێن بهێت یێن په‌رله‌مانێ ئه‌رمینیا دێ ئه‌ڤ خزمه‌ته‌ كه‌فته‌ كارى.



خۆیا ژی کر، كو نها نێزیكى 100 هزار كوردێن ئێزدى و 300 خێزانێن كورد یێن بۆسلمان ل وه‌لاتێ ئه‌رمینیا دژین و هژماره‌كا زۆر یا ئاشۆریان ژى و كه‌ساتیه‌كێ كوردێ ئێزدى و كه‌ساتیه‌كێ كورد یێ بۆسلمان و كه‌ساتیه‌كێ ئاشوورى دێ ڤان كورسیێن په‌رله‌مانێ ئه‌رمینیا وه‌رگرن و د هه‌لبژارتنان دا ره‌نگه‌ هه‌ڤركى هه‌بیت و هنده‌ك كه‌ساتیێن دى ژى خوه‌ به‌ربژێركه‌ن و سێ نوونه‌ر كوتایان وه‌رگرن.
bas news-