دادگای فیدڕاڵیی عێراق، لە بەرژەوەندیی دەنگدەرانی دەرەوەی وڵات و ھێزی پێشمەرگەی كوردستان، بڕیارێكی نادەستووری و نایاسایی ڕەت كردەوە، ئەندامێكی ئەنجوومەنی نوێنەرانی عێراقیش دەڵێت، بڕیارەكەی دادگای فیدڕاڵیی عێراق، لە جێی خۆیدایە و دەستوورییە، كە بە ھەوڵی جیددی پارتی دیموكراتی كوردستان بوو.

٦ی ٦ی ٢٠١٨، لە دانیشتنی ئەنجوومەنی نوێنەرانی عێراقدا، كە چەند لایەنێكی سیاسی لە ھەڵبژاردنەكانی ١٢ی ئایار دەنگی پێویستیان بە دەست نەھێنابوو، داوایان كرد دەنگی ئاوارەكان و دەنگدەرانی دەرەوەی وڵات و پێشمەرگە و دەنگدانی تایبەت ھەژمار نەكرێت. پەیوەست بەم پرسە، پارتی دیموكراتی كوردستان بە فەرمی تانەی لە بڕیارەكەی ئەنجوومەنی نوێنەران داو و بە بڕیارێكی نادەستووری ناوی برد.

ئەمڕۆ دادگای فیدراڵیی عێراق، بۆ بڕیاردان لەسەر تانەی سەرۆككۆمار، پارتی دیموكراتی كوردستان و كۆمیسیۆنی باڵای ھەڵبژاردنەكان، سەبارەت بە ھەڵوەشاندندەوەی ھەمواری سێیەمی یاسای ھەڵبژاردن كە لەلایەن پەرلەمانی عێراقەوە بڕیاری لەبارەوە دراوە، بڕیاری دا كە ژماردنەوەی دەنگەكان بە دەست، دەستوورییە و ھەڵوەشاندنەوەی دەنگی دەنگدەرانی دەرەوە و دەنگدانی تایبەتی لە ھەرێمی كوردستاندا ڕەت كردەوە.

تاریق گەردی، ئه‌ندامی ئه‌نجوومه‌نی نوێنه‌رانی عێراق، بە ماڵپەڕی فەرمیی پارتی دیموكراتی كوردستانی ڕاگەیاند: "لە سەرەتای بڕیارەكانی ئەنجوومەنی نوێنەراندا، فراكسیۆنی پارتی و زۆربەی یاساناسان پێشبینیی ئەوەمان دەكرد، كە ئەو دانیشتنە ڕەت بكرێتەوە، چونكە بە دوو بڕگە دەبێـت، بڕگەی یەكەم تایبەت بەم یاسایەیە كە دەرچووە و دەڵێت دەبێ دەنگە تایبەتەكان و دەنگی دەرەوەی وڵات و ئاوارەكان ڕەت بكرێنەوە، ئەم بڕیارە بە ئاشكرا پێشێلكردنی دەستوور بوو، چونكە ھەموو دەنگدەر و ھاووڵاتییەك لە ھەر شوێنێك و ھەر ئایین و ڕەنگێك بێت، مافی دەنگدانی ھەیە و كەس بۆی نییە ئەم مافەی زەوت بكات. تایبەت بە بڕگەی دووەمیش، كە بڕیاری ھەڵبژاردنەوەی دەنگەكان بوو و پەسەند كرابوو، كە گومان ھەبوو لە ئامێرە ئەلیكترۆنییەكان، ئەمە بڕیارێكی یاساییە و دادگایش ئەمڕۆ بڕیاری دا كە دەستوورییە".

گەردی، گوتیشی: "بە شێوەیەكی گشتی وەك ئەندامێكی ئەنجوومەنی نوێنەرانی عێراق و وەك یاساناسێكیش باوەڕمان وایە بڕیارەكەی دادگای فیدڕاڵیی عێراق، یاساییە و لە بەرژەوەندیی ھەرێمی كوردستان و دەنگی ھێزی پێشمەرگەی كوردستانە."

ئەو ئەندامەی ئەنجوومەنی نوێنەرانی عێراق دەشڵێت: "لەسەر داواكاری پارتی دیموكراتی كوردستان بوو كە دادگای فیدڕاڵی ئەم بڕیارانەی دا و، پارتی بە فەرمی تانەی لەو بڕیارە نادەستوریانە گرت و داكۆكی لە دەنگی ئاوارەكان و دەنگدەرانی دەرەوەی وڵات و ھێزی پێشمەرگە كرد، بێگومان چەند لایەنێكی تری سیاسیی كوردستان و عێراقیش، لەگەڵ ئەوەی دەنگیان بۆ ھەڵوەشانەوەی دەنگەكان دا و پشتگیریی بڕیارە نادەستوورییەكەیان دەكرد، لەبەر ئەوە بوو كە دەنگی پێویستیان نەھێنابوو."
kdp-