لە شارەكانی كەركووك و خورماتوو جۆرێك زیندەوەر كە قەبارەكەی لە سیسركە بچووكترە پەیدا بووە و ئەوەش تا ڕادەیەك مەترسیی لای بەشێك لە هاووڵاتییان دروست كردووە، چونكە وەك هاووڵاتییانی ئەو شارانە ئاماژەی پێ دەدن دەبێتە هۆی هەستیاریی پێست.

یەشار كفری، هاووڵاتیی دانیشتووی كەركووك، وێنەی ئەو جۆرە زیندەوەرەی لە ئەكاونتی خۆی لە تۆڕی كۆمەڵایەتی (فەیسبووك) بڵاو كردووەتەوە و نووسیویەتی، لە ماڵەكەمدا ئەم جۆرە زیندەوەرە نامۆیەم دۆزییەوە.

هاوكات چەندین هاووڵاتیی دیكەی كەركووك و خورماتوو لە ئەكاونەتەكانی خۆیان لە تۆڕی كۆمەڵایەتی (فەیسبووك) هاوشێوەی یەشار كفری وێنەی ئەو زیندەوەریان بڵاو كردووەتەوە و مەترسییەكانیان ئاشكرا كردووە كە دەبێتە هۆی دروستبوونی هەستیاری و سووربوونی پێست.

لەم بارەیەوە، حوسێن سابیر، بەرپرسی ڕاگەیاندنی فەرمانگەی تەندروستیی كەركووك، ئەمڕۆ سێشەممە 19/6/2018، ڕايگەیاند: "ئەو جۆرە زیندەوەرە ساڵانە زیاتر لە كاتی دروێنەی گەنم و جۆ پەیدا دەبێتەوە، بۆیە ئەوە كاری بەڕێوەبەرایەتیی كشتوكاڵە كە جۆرە دەرەمانێكی دژ بەو جۆرە زیندەوەرە بڵاو بكەنەوە بۆ لەناوچونیان، چونكە ئەوە كاری ئێمە نییە هەستین بەلەناوبردنیان ئەو بوونەوەرە لەو شوێن و ناوچانەی كە زیاتر كشتوكاڵین، یان داری زۆر هەبێت زیاتر پەیدا دەبن".

گوتیشی، هەر كەسێك ئەو جۆرە زیندەوەرە پێوە بدات، ئەوا چارەسەرییەكەشی ئاسانە و مەرهەمی هەستیاری بۆ بەكار دەهێنرێت.

لە هەندێ ناوچەی دیکەی کوردستان بەو زیندەوەرە دەگترێت "سوون" و لە کاتی پێگەیشتنی دەغڵ و دان و گەنم و جۆدا پەیدا دەبێت و جیا لە تەندروستیی مرۆڤ، بۆ کشتوکاڵ و بەتایبەتی زیانگەیاندن بە گەنم و جۆ زیانبەخشە











باسنيوز