دەرھێنەری کوردی ڕۆژئاوا، تەلال دەرکی، کە ئێستا لە بەرلین دادەنیشێ، خەڵاتی زێڕینی پەنجاوھەشتەمین فێستیڤالی فیلمی دۆکومێنتاریی کراکۆڤی وەرگرت بۆ فیلمیکی بە ناوی "باوکان و کوڕان"، کە تێیدا نیشانی دەدات چۆن لە نێو داعشدا باوکەکان کوڕەکانیان پەروەردە دەکەن بە بیروباوەڕی توندڕەوی و کاری تیرۆریستی.

تەلال دەرکی بە کامیراوە چووە نێو داعش لە سووریا و خۆی وا نیشان دا کە لەگەڵ ئەواندایە و ھاوڕایە لەگەڵیان، بۆیەش توانی بچیتە ناو مەیدانەکانی شەڕ و مەشق و ڕاھێنان و توانی ڕیکۆردی ڤیدیۆیی تۆمار بکات.

لیژنەی ھەڵسەنگاندنی فێستیڤالەکە بەو هۆیەوە ئەو دەرھێنەرەی ناو نا "چاونەترس لە جیهانێکی دڕەندەدا".

فیلمەکە هاوکات خەڵاتێکی تریشی بردەوە، کە ئەویش خەڵاتی فیدراسیۆنی ڕەخنەگرانی فیلمە:

International Federation of Film Critics (FIPRESCI)

زیاد ڕەئووف، نوێنەری حکوومەتی ھەرێمی کوردستان لە پۆلۆنیا پیرۆزبایی لە تەلال دەرکی کرد و پێشنیاری کرد لە فێستیڤالەکانی کوردستاندا بەشداری بکات و فیلمەکەی پێشان بدا.

لە کاتی فێستیڤاڵەکەی کراکۆڤدا فیلمێکی دۆکومینتاریی دی لە کوردستانەوە پیشکەش کرا، ئەویش فیلمی دەرھێنەر، هۆگر هیرۆری بوو بە ناوی "دێمینەر"، کە چیڕۆکی ژیان و پاڵەوانیەتیی پێشمەرگەی شەھید فاخیرە.

ئەو فیلمەش لە لایەن بینەران و ڕەخنەگرانەوە زۆر بەرز ھەڵسەنگێنرا و پاش نمایشکردنی فیلمەکە دێبەیتێکی دوورودرێژی لەسەر کرا بە ئامادەبوونی پڕادیسۆری فیلمەکە و قوتابیان و ڕەوەندی کوردستانی.
kdp-