هاوولاتیێن ده‌ڤه‌را سه‌رسنكێ ل قه‌زا ئامێدیێ گازندا ژ حكوومه‌تا عیراقێ دكه‌ت بۆ هنارتنا وى برنجێ ل گه‌ل ئاهێن خوارنێ فرێكرى كو هه‌موو یێ ڕزى و پووچه‌ و داخوازا قه‌ره‌بوویێ دكه‌ن.

مشیر كۆركویى، هاوولاتیه‌كێ ده‌ڤه‌را سه‌رسنكێیه،‌ ئاگه‌هدار دكه‌ت كو ل ده‌ڤه‌را وان ل هژماره‌كا بریكارێن دابه‌شكرنا ئاهێن خوارنێ برنجێ ڕزى و خراببووى و یێ كیفكۆیى ل سه‌ر خێزانێن ده‌ڤه‌رێ به‌لاڤ دكه‌ن، د سه‌ر هندێ را زانیارى بۆ وان هاتینه‌ كو عیراقێ ژ نوو ئه‌ڤ برنجه‌ ژ ئومبارێن خوه‌ ئینایه‌ ده‌ر و بۆ قه‌زا ئامێدیێ و پارێزگه‌ها دهۆكێ فرێكریه‌ و هاوولاتى گه‌له‌ك گازندا ژ ڤى جۆرێ برنجى دكه‌ن.

ناڤبرى، ئاشكرا ژى كر، كو هاوولاتیێن سه‌رسنكێ داخواز ژ حكوومه‌تا عیراقێ و هه‌رێمێ دكه‌ن قه‌ره‌بوویا خه‌لكێ ده‌ڤه‌رێ ل سه‌ر ڤى برنجى بهێته‌ كرن و چاڤدێریه‌كا تۆند ل سه‌ر دابه‌شكرنا ئاهێن خوارنێ بهێته‌ كرن.

نازم محه‌مه‌د عه‌لى، رێڤه‌به‌رێ كۆمپانیا گشتى یا دان و دكاكان ل پارێزگه‌ها دهۆكێ بۆ (باسنیۆز)، دیار كر: ”مه‌ د ڤێ مه‌ها بۆرى دا هژماره‌كا مه‌زن یا ئاهێن خوارنێ ژ حكوومه‌تا عیراقێ وه‌رگرتیه‌ و بۆ بریكارێن دابه‌شكرنا ئاهێن خوارنێ ره‌وانه‌كریه‌، به‌لێ چو گازنده‌ بۆ مه‌ نه‌هاتینه‌ و گۆت: دێ دووڤچوونا وى برنجێ ل سه‌رسنكێ كه‌ین كا ژ چو ئۆمبار ده‌ركه‌فتیه‌ و چاوا برنجێ رزى هاتیه‌ دابه‌شكرن“.









باسنيوز