دوای ڕووداوەکانی خیانەتی ١٦ی ئۆکتۆبەری ساڵی ڕابردوو، جگە لە کوشتن و ڕفاندن و تاڵانکردن دەسەڵاتدارانی بەغدا دەستیان بە گۆڕینی بەرپرس و بەڕێوەبەرە کوردەکانی ئەو ناوچانەش کرد، کە لە ئەنجامی پڕۆسەی داگیرکاری کەوتوونەتە ژێر ڕکێفی خۆیان، قایمقامی خورماتووش دەڵێ، بە یاسا بێت من ھەر قایمقامی خورماتووم.

چەند ڕۆژێک دوای داگیرکردنی قەزای خورماتوو، حەشدی شەعبی و دەسەڵاتدارانی عێراق فشاریان خستە سەر ئەنجومەنی قەزای خورماتوو و پارێزگای دیالە بۆ لادانی قایمقامە کوردەکەی قەزای خورماتوو لەگەڵ ژمارەیەک بەڕێوەبەری دیکەی کورد لەو قەزایە. لەم بارەیەوە، شەلال عەبدول، قایمقامی قەزای خورماتوو بە ماڵپەڕی فەرمیی پارتی دیموکراتی کوردستانی ڕاگەیاند: "پێشتر لە دادگای عێراق سکاڵامان لەبارەی لادانم لە پۆستی قایمقامی خورماتوو تۆمار کردبوو، بەڵام دیارە سکاڵای ئێمەیان بە لاڕێدا برد و کردیان بە پرسێکی سیاسی، دادگای فیدڕاڵی لە بەرژەوەندیی ئەوان، واتە ئەنجومەنی قەزاکە بڕیاری دەرکرد."

بە کەڵکوەرگرتن لە پڕۆسەی داگیرکاری و تێکدانی تەوافوقی سیاسی، ساڵی ڕابردوو چەند بڕیاری دژی کورد لە بەغداوە دەرچوون و بەشێک لەو بڕیارانەش لە ڕووی یاساییەوە ھیچ بەھایەکیان نییە و تەواو مۆرکی سیاسییان پێوە دیارە. قایمقامی خورماتوو ئاماژەی بۆ ئەوە کرد: "پێم وایە بڕیارێکی نایاساییە و بڕیارە لە چەند ڕۆژی دابێ سەردانی شاری بەغدا بکەم و لە دادگای باڵای فیدڕاڵی تانەم لە بڕیاری دادگا داوە و داوای تەمیزم کردووە، پێشم وایە چونکە بڕیارەکە یاسایی نەبووە، ڕەنگە لە لایەن دادگای باڵای فیدڕاڵییەوە ھەڵبوەشێندرێتەوە."

لەبارەی ڕەوشی ئەمنیی قەزای خورماتوو و جووڵەی داعشەوە لەو سنوورە، شەلال عەبدول ئاماژەی بۆ ئەوە کرد: "ڕەوشی قەزای خورماتوو ئێستا ھەندێک باشترە لە ماوەکانی پێشوو، بەڵام لە دەوروبەری سەنتەری قەزای خورماتوو، بەتایبەت لە ڕۆژئاوای قەزاکە، سنوورەکان بەتەواوەتی کۆنتڕۆڵ نەکراون و لە داعش پاکسازی نەکراون و مەترسیی گەورە هەیە کە داعش دەستیان بەسەردا بگرێت، چونکە چالاکیی گرووپی تیرۆریستیی داعش لەو ناوچەیە زیادی کردووە."
kdp-