قائیمقامێ قه‌زا شنگالێ به‌یاننامه‌كێ ئاراسته‌ى به‌غدا و هه‌ولێر و واشنتن و نه‌ته‌وه‌یێن ئێكگرتى دكه‌ت و ئاشكرا دكه‌ت كۆمسیۆن تۆمه‌تباره‌ ب سۆتنا ده‌نگێن ئێزیدیان و پێدڤیه‌ پێداچوون دخوارنا مافێن ئێزدیاندا بهێته‌ كرن.


مه‌حما خه‌لیل دوێ به‌یاننامێدا كو دانه‌یه‌ك بده‌ست ب(باسنیوز) كه‌فتیه‌، گۆتیه‌ ئه‌ز بناڤێ خه‌لكێ شنگال و زۆمار و رۆژئاڤایێ دیجله‌، ئاخا كه‌ڤنترین ئایین دمێژوویێدا ل سه‌ر رابووى كو ئایینێ ئێزدیه‌، گازندا ژ هه‌وه‌ دكه‌م بۆ سۆتنا ده‌نگێن ئێزدیان و وه‌رنه‌گرتنا چ نوونه‌رێن ئێزدى ل په‌رله‌مانێ عیراقێ، ئه‌ڤه‌ دده‌مه‌كى دایه‌ كو دهه‌موو خۆلێن به‌رى نها یێن په‌رله‌مانێدا ئێزدیان نوونه‌رێ خوه‌ هه‌بوویه‌ و ب تنێ ئه‌ڤه‌ ئێكه‌مین خۆله‌ بێ نوونه‌رێ ئێزدیان ب رێڤه‌ دچیت، هوون هه‌موو ژى باش دزانن كو مه‌زنترین تاوانا كۆمه‌لكۆژى بسه‌رێ خه‌لكێ شنگالێ هاتیه‌ لسه‌ر ده‌ستێ تیرۆریستێن داعشێ و ئه‌گه‌ر ب پشته‌ڤانیا حكوومه‌تا هه‌رێما كوردستانێ نه‌بایه‌، نها ره‌وشا ئێزدیان دا گه‌له‌ك خراپتر بیت.


مه‌حما ئه‌و یه‌ك ژى دیار كریه‌، هوون هه‌موو باش ل سه‌ر قوربانیێن مه‌ د ئاگه‌هدارن و هوون دزانن هه‌تا نها ژى ره‌ڤاندیێن ئێزدى و خه‌لكێ شنگالێ د ده‌ستێ تیرۆرستێن داعشێدا د ئێخسیرن و د سه‌ر ڤێ یه‌كێ را دایكێن شه‌هید و خێزانێن ره‌ڤاندیان به‌ره‌ڤ سندۆقێن ده‌نگدانێ چوون و رێژا پشكداریێ د هه‌لبژارتنێن په‌رله‌مانێ عیراقێ دا ل شنگالێ گه‌هشته‌ 89% و شنگالى د سه‌ختترین ده‌م و ره‌وش دا ل ناڤ كه‌مپان دا قه‌ستا بنگه‌هێن ده‌نگدانێ كرن.
bas news -