دوای بڵاوبوونەوەی هەندێ هەواڵ و دەنگۆ لە تۆڕە کۆمەڵایەتییەکان لەبارەی بوونی نەخۆشیی "ئیبۆلا" لە شاری هەولێر، بەڕێوەبەرایەتیی گشتیی تەندروستیی هەولێر بە بڵاوکردنەوەی ڕوونکردنەوەیەک هاووڵاتیانی دڵنیا دەکاتەوە کە ئەو هەواڵانە دوورن لە ڕاستییەوە.


لە ڕوونکردنەوەکەی بەڕێوبەرایەتیی گشتیی تەندروستیی هەولێردا کە ئەمڕۆ چوارشەممە 2018/5/16 ، هاتووە: "بەڕێوەبەرایەتیی کاروباری پاراستنی تەندروستیی هەولێر و تیمە پسپۆڕییەکان ماوەی چەند ڕۆژێکە لێکۆڵینەوە و پشکنین دەکەن، دەرەنجام هیچ حاڵەتێکی نەخۆشیی ئیبۆلا دەرنەچووە، بۆ دڵنیابوون و پشتڕاستکردنەوە، نموونەکانی خوێن ڕەوانەی تاقیگەی ناوەندیی بەغدا کرا، دوای دووبارە پشکنینەوە لەلایەن وەزارەتی تەندروستیی عێراقی فیدراڵ، ئەمڕۆ دڵنیا کراینەوە کە هیچ حاڵەتێکی ئەم نەخۆشییە نییە و پشکنینەکان نیگەتیڤە".



لە بەشێکی دیکەی ڕوونکردنەوەکەی تەندروستیی هەولێردا هاتووە، بۆیە هاووڵاتیان دڵنیا دەکەینەوە تەنیا پڕوپاگەندەی بێ بنەمایە و دروستکردنی دڵەڕاوکێیە و ئەم دەنگۆیە ڕەت دەکەینەوە و ئیدانەی هەرکەس و لایەنێک دەکەین کە بەبێ گەڕانەوە بۆ سەرچاوەی زانستی و تاقیگەیی هەڵبستێت بە بڵاوکردنەوەی ئەم پڕوپاگەندانە و لە کۆتاییدا هیوای تەندروستیی باش بۆ هاووڵاتیان دەخوازین.



بەڕیوەبەرایەتیی گشتیی تەندروستیی هەولێر

16ی ئایاری 2018








باسنیوز