سه‌ركرده‌یه‌كی پارتی دیموكراتی كوردستان ده‌ڵێ له‌دوای ئه‌وه‌ی جێگری سه‌رۆكی پارتی له‌ سلێمانی جه‌ختیكرده‌وه‌ كه‌ له‌ سنووری پارێزگاكه‌ ئیرهابی فكری له‌ دژی پارتی بوونی هه‌یه‌، چه‌ند لایه‌نێك هه‌وڵی گواستنه‌وه‌ی ئیرهابی فكری له‌ سلێمانییه‌وه‌ بۆ هه‌ولێر ده‌ده‌ن.



عه‌لی عه‌ونی ئه‌ندامی سه‌ركردایه‌تی پارتی دیموكراتی كوردستان بۆ(باسنیوز)گوتی: "چه‌ند لایه‌نێكی سیاسیی كورد له‌ هه‌وڵی ئه‌وه‌دان كه‌ ئه‌و ئیرهابه‌ فكرییه‌ی كه‌ له‌ سنووری سلێمانی و زۆنی ڕه‌نگاوڕه‌نگ هه‌یه‌ بیگوازنه‌وه‌ بۆ شاری هه‌ولێر و چه‌ند ناوچه‌یه‌كی دیكه‌ ئه‌مه‌ش بۆ ئه‌وه‌ی بڵێن له‌ سنووری ده‌سه‌ڵاتی پارتییش ئیرهابی فكری هه‌یه‌".



گوتیشی: "هه‌رچه‌نده‌ پێشووتریش ئه‌و هه‌وڵه‌ هه‌بووه‌ به‌ڵام له‌دوای قسه‌كانی نێچیرڤان بارزانی جێگری سه‌رۆكی پارتی كه‌ له‌ كه‌رنه‌ڤاڵه‌كه‌ی سلێمانی كردی و گوتی ئیرهابی فكری له‌ سنووری پارێزگای سلێمانی هه‌یه‌، هه‌وڵه‌كان چڕتربوونه‌ته‌وه‌، بۆیه‌ پێموایه‌ ڕووداوی هێرشكردنه‌ سه‌ر ڕابوون مه‌عروفیش هه‌ر خۆیان كردوویانه‌ و له‌ چوارچێوه‌ی ئه‌و هه‌وڵانه‌یه‌".



ئه‌و سه‌ركرده‌یه‌كی پارتی ڕاشیگه‌یاند كه‌ هه‌وڵی ئه‌و لایه‌نانه‌ له‌و ناوچانه‌ی كه‌ پارتی لێیان باڵاده‌سته‌ شكست ده‌هێنێت و هیچ ئه‌نجامێكی نابێت









باسنیوز