سەرۆكێ‌ جڤاتا قەزا شنگال دیاركر كو حەشدا شەعبی دێ‌ سەختەكارێن مەزن ل هەلبژارتنیێن پەرلەمانێ‌ عێراقی دناڤ قەزا شنگالێ‌دا ئەنجام دەن و نوكە كار دكەت دەست ب سەر هەموو بنگەهیێن دەنگدانێ‌دا بگرت ل شنگال داكو ئاسانی سەختەكاریان ئەنجام بدەت.

وەیسی نایف بدل، سەرۆكێ‌ جڤاتا قەزا شنگال دیار كر: "ئەگەر چاڤدێرێن نیڤ دەولەتی ل سەر سەندووقیێن دەنگدانێ‌ ل قەزا شنگال نەهێنە دانان دێ‌ حەشدا شەعبی دەنگیێن وان وەلاتیان بكار ئینت یێن چووینە دەرڤەی وەلاتی دێ‌ سەختەكاریان ئەنجام دەت، چونكو هەتا نوكە ژی حەشدا شەعبی كێشە دروست دكەت و ناهێلت بەغدا كارتیێن ئاوارێن شنگال بەلاڤ بكەت سەرجەمێ‌ 180 هزار دەنگدەرێن شنگال بتنی كارتیێن 60 هزار دەنگدەران ژ بەغدا رەوانە دهۆكێ‌ كرینە و ئەوژی هیشتا هەموو نەهاتینە بەلاڤكرن یێن دیتر حەشدا شەعبی ل مووسلێ‌ و شنگالێ‌ هێلاینە داكو مەرەمیێن خوە پێ‌ بجه بینن".

مەحما خەلیل قایمقامی قەزا شنگال دیار كر: "حەشدا شەعبی دێ‌ دەست ب سەر هەموو بنگەهیێن دەنگدانێ‌دا گرت دناڤ سەنتەرێ‌ قەزا شنگالێ‌دا بیگومان دێ‌ سەختەكاریێ‌ كەن د ئەنجامیێن هەلبژارتنیێن پەرلەمانێ‌ عێراقیدا ل ناڤ سەنتەرێ‌ قەزا شنگال نوكە 20% خەلك شنگال یێن ڤەگەریاینە شنگال دێ‌ حەشدا شەعبی هەموو هەولدانان كەت دەنگیێن ڤان كەسان بۆ حەشدا شەعبی بن".

گۆت ژی:" ئەم داخازی دكەین حكومەتا عێراقی و كۆمیسیۆن رازی نەبن حەشدا شەعبی ل بەر بنگەهیێن دەنگدانێ‌ بیت و چاڤدیرێن نێڤدەولەتی ل سەر سەندوقێن دەنگدانێ‌ بهێنە دانان ل قەزا شنگال".











باسنيوز