فەرهاد ئەتروشى: عیراقێ ب ملیاران دولار خەرجکرینە و نەشیاینە ئارامیا ل هەرێمێ هەیى ل بهغدا پەیدا بکەت.
فەرهاد ئەتروشى، پاریزگەرێ دهۆکێ گۆت:" دبانگەشەیا هەلبژارتناندا هندەک کاندیدو لایەنێن سیاسى بێ بەختیان دکەن و هەر تشتەکێ لڤى وەلآتى هاتیەکرن ل چنەیێ ددەن پێخەمەت بدەستڤە ئینانا چەند دەنگەکا، ئەم وەک حکومەت پشکەک نینین ژڤێ ململانا نەساخلەم و نهدروست، بەلێ تشتەک رەوا نینە هندەک لایەن دەستکەفتێن مللەتێ کورد بن ئاخ بکەن، کو ژ ساڵا1991ێ تا ئەڤرۆکە گەلەک کارێن بەرفرەهـ هاتینەکرن بگرە ژ ئاڤهدانیکرنێ و پەروەردە و زانستێ چ کەرتێ تایبەت یان حکومەت پێ راببیت، راستە خەلکێ کوردستانێ پشکەکا مەزن دڤێ ئاڤهدانکرنێدا هەبوویە، بەلێ حکومەتا هەرێما کوردستانێ ئەو ژینگەهـ و ئارامییە پەیداکریە داکو خەلک بشێت ئاڤهدانیێ بکەت".
پارێزگەرێ دهۆکێ زەلالکر:" سەقامگیرى و ئاسایش و ئارامیا ل هەرێما کوردستانێ هەیى گەلەکا کێمە ل عیراقێ و وەلاتێن دەردۆر، کو وان ب ملیاران دولار خەرجکرینە و نەشیاینە وێ ئارامیا ل هەرێمێ هەیى ل وەلاتێن خۆ پەیدا بکەن و ئەڤ ئارامیا ل هەرێمێ ژلایێ دەزگەهێن ئەمنى ڤە دئێتە دهستهبهرکرن ب هەرەوە نەهاتیە بەلکو ب رەنج و زەحمەت پەیدا بوویە، چونکى ئارامى شەنگەستەیەکا بهێزە بۆ ئاڤهدانکرنێ و دابینکرنا کیانەکێ سیاسى لسەر ئاستێ نێڤدەولەتى، دیسان ئەڤ كەش و هەوایێ ئازادیێ ل هەرێما کوردستانێ هەیى بگرە ژ رادەربڕینێ و رەخنەیێن جورەو جور تا وێ رادەیێ هندەکا سنورێن یاسایى دەرباز کرینە دژى حکومەتا هەرێمێ، ئەڤە بخۆ بەلگەیە کو حکومەتا هەرێما کوردستانێ کارەکێ مەزن ئەنجامدایە".
فەرهاد ئەتروشى ئاماژەدا:" ل جیهانێ هەمیێ روونەدایە دماوەیێ دوو سالاندا پارتەک روبعەکا کورسیکان د پەڕلەمانیدا ببەت و گەلەک جهێن دەستهەلاتداریێ برێڤەببەت و چ تشتێ نوو و باش نەکەت و بهێت رەخنێ ل سیستەمێ حوکمرانیێ بکەت و هەکە خەلەتى هەبن پشکەکا ژوان خەلەتیا ئەو بخۆ ژێ بەرپرسیارن، چونکى ئەو ژى دناڤا حکومەتێدا بریاردەر بووینە، ژبەر هندێ گرنگە خەلکێ مە بزانیت ئەڤ گل و گازندە بتنێ هندەك موزایەدەیێن سیاسى نە لسەر دەستکەفتێن حکومەتا هەرێما کوردستانێ".
ئەتروشى بەحسکر، ئەم پشتەڤانین بۆ رەخنەکا ئاڤاکەرو هەر راستیەکا بهێتە گۆتن و ئاراستەکرن، بەلى نابیت چ لایەن خۆ ژ خەلەتیا بێ گونەهـ بکەن و ل سەرکەفتنان خۆ ب پشکەک ژێ بزانن، چونکى هەر کەسەکێ ب قەوارێ خۆ خەلەتى کرینە و دەستکەفتێن مەزن ئەون یێ حکومەتا هەرێما کوردستانێ و پارتى دیموکراتى کوردستان تومارکرین.
KDP
