ل رۆژا چوارشه‌مبى 2/5/2018 د سێ روودانێن جودا دا ل پارێزگه‌ها دهۆكێ چوار هاوولاتى بوونه‌ قوربانى، د روودانه‌كێ دا دوو گه‌نجێن ئاواره‌ خه‌ندقین و د روودانا دوویێ دا بریسیه‌كێ ل قه‌زا شێخان گه‌نجه‌كێ ئاواره‌ كۆشت و ل دره‌نگیا شه‌ڤا دیاركرى ژى كه‌سه‌كى ل تاخێ سه‌رهلدان ل سه‌نته‌رێ دهۆكێ برایێ خوه‌ كۆشت.



هێمن سلێمان، په‌یڤدارێ رێڤه‌به‌ریا پۆلیسێن پارێزگه‌ها دهۆكێ دیار كر، ل ده‌مژمێر 11:00 شه‌ڤا چوارشه‌مب ل سه‌ر پێنچشه‌مبى، ل تاخێ سه‌رهلدان ل سه‌نته‌رێ پارێزگه‌ها دهۆكێ برایه‌كى د ژیێ 37 سالیێ دا ژ ئه‌نجامێ شه‌ره‌ده‌ڤه‌كى برایێ خوه‌ یێ 45 سالى ب گۆلله‌یێن كلاشینكوفێ كۆشتیه‌ و هێشتا تاوانبار نه‌هاتیه‌ ده‌سته‌سه‌ركرن و ئه‌ڤ روودانه‌ ژى سه‌را كێشه‌یه‌كا جڤاكى بوویه‌.


رائید بێوار عه‌بدولعه‌زیز، په‌یڤدارێ رێڤه‌به‌ریا به‌ره‌ڤانیا باژێرى ل پارێزگه‌ها دهۆكێ دیار كر، د هه‌مان رۆژا چوارشه‌مبى دا 2/5/2018 ل نێزیك كه‌مپا چه‌م مشكۆ ل سه‌ر خابوورێ زاخۆ، دوو گه‌نجێن ئاواره‌یێن وێ كه‌مپێ ب مه‌ره‌ما مه‌له‌ڤانیان خوه‌ خستینه‌ رووبارێ خابوورى و د ئه‌نجام دا هه‌ردوو خه‌ندقینه‌ و گیانێ خوه‌ ژ ده‌ستدایه‌ و تیمێن رێڤه‌به‌ریا مه‌ یێن نقۆمڤانان ته‌رمێن وان ژ ئاڤێ ئیناینه‌ ده‌ر و بۆ پزیشكیا داد ل قه‌زا زاخۆ ره‌وانه‌كرینه‌.


ئاشكرا ژى كر، ئێك ژ وان گه‌نجان خه‌لكێ كۆمالگه‌ها سیباشێخدرێ بوو و یێ دن ژی خه‌لكێ كۆمه‌لگه‌ها خانه‌سۆرێ بوو ژیێ وان 17 و 18 سال بوون.



د هه‌مان رۆژا چوارشه‌مبى دا ل سه‌نته‌رێ قه‌زا شێخان گه‌نجه‌ك ژ ئه‌گه‌ره‌كێ لێدانا بریسیێ گیانێ خوه‌ ژ ده‌ست دده‌ت.



باسم قاسم، ژ نێزیك جهێ روودانێ ب دیار كر، پشتى تێكچوونا سه‌قایێ ده‌ڤه‌را شێخان و هاتنا بریسیێن ب هێز، ژ نشكه‌كێ ڤه‌ بریسیێ ل گه‌نجه‌كێ قه‌زا شنگال دایه‌ ل قه‌زا شێخان وه‌كو ئاواره‌ لێ دژیت و د جهدا گیانێ خوه‌ ژ ده‌ست دایه‌.


چه‌خت ل وێ یه‌كێ ژى كر كو ئه‌و گه‌نج خه‌لكێ ناحیا گرعزێر بوو ل قه‌زا شنگالێ و نۆكه‌ ئه‌و وه‌ك ئاواره‌ ل كه‌مپا كه‌به‌رتوو 2 ئاكنجی یه‌، ژبه‌ر ب ده‌ستڤه‌ئینانا پاریێ ژیانێ ئه‌وی قه‌ستا كارێ جووتیارێ و چاندنێ كربوو ل قه‌زا شێخان، لێ ژ ئه‌نجامێ بریسیه‌كێ وی ژیانا خوه‌ ژ ده‌ست دا.

bas news-