لێپرسراوێکی پەروەردەی شارەزوور ڕای گەیاند، کە بڕیار وایە پارەی سێ مانگی مامۆستایانی وانەبێژ بەسەریەکەوە خەرج بکرێت، ئەو پارەیەش کراوە بە چەک و چەند ڕۆژێکی دیکە دەست بە خەرجکردنی دەکرێت.

نەبیل حەمە ساڵح، لێپرسراوی خۆیەتیی میلاکات لە پەروەردەی شارەزوور ڕاگەیاند: "ئاگاداری ئەو قوتابخانانە دەکەینەوە، کە مامۆستای وانەبێژیان ھەیە، ڕۆژی چوارشەممە 2/5/2018، سەردانی بەڕێوبەرایەتیی پەروەردەی شارەزوور بکەن، بە مەبەستی وەرگرتنی پارەی مامۆستایانی وانەبێژی ھەر سێ مانگی ( 10 و 11 و 12ی ساڵی 2017) بەسەریەکەوە".

ئاماژەی بەوەش دا، کە پێشتر پارەی مامۆستایانی وانەبێژ دوا خرا، بەڵام ڕەزامەندیی وەزارەتی داراییان بۆ وەرگرتووە، دەشڵێت: "ئێستا ئەو پارەیە کراوە بە چەک بۆ ڕۆژی چوارشەممە و پارەی سێ مانگی ساڵی ڕابردووی مامۆستایانی وانەبێژی خەرج دەکرێت".
bas news-