دەلیڤە ناهێتە دان مریشكێن ساخ ل دهۆكێ بهێنە فرۆتن
د. عەبدولرەزاق ئێمینكی، بەرپرسێ پشكا ساخلەمیا ئاژەلی ل رێڤەبەریا ڤێتێرنەری ل پارێزگەها دهۆكێ دياركر، ل سالا بۆری ل مەها ئیلۆنێ، پارێزگارێ دهۆكێ و جڤاتا پارێزگەها دهۆكێ بریار دابوون رێ بهێتە دان بۆ هندێ بازرگان پرۆژەیێن فرۆتنا مریشكێن ساخ ل ناڤ سەنتەرێ دهۆكێ دانن، بەلێ پشتی دەركەفتنا نەخۆشیا ئەنفلاوەنزایێ ل عیراقێ، ئەڤ بریارە هاتبوو راگرتن و هەتا دەستپێكا ڤێ مەها چوار ئەڤ بریارە یا هەلاویستی بوو.
بەرپرسێ پشكا ساخلەمیا ئاژەلی خۆیا كر كو ئەم وەكو رێڤەبەریا ڤێتێرنەریا دهۆكێ و رێڤەبەریا ژینگەهێ و رێڤەبەریا گشتیا ساخلەمیا دهۆكێ ژی ل گەل هندێ نینین رێ بهێتە دان مریشكێن ساخ ل دهۆكێ بهێنە فرۆتن، چونكو مە تێست بەری نها هەنە و ئەڤ پرۆژە یێ سەركەفتی نابیت و گۆت ژی: مە هندەك پرۆژەیێن ب ڤی شێوەی ل دەوروبەرێ دهۆكێ دانابوون، بەلێ ژ بەر پیساتی و بێھنێ، پرۆژە سەرنەگرتن و خەلكێ وان دەڤەران ژی گەلەك گازندە دكرن و نەشیان خوە ل بەر بێهنێ بگرن.
ئاشكرا ژی كر كو نها دوو وەبەرهێنەران پێشكێشی قائیممقامیا دهۆكێ كریە بۆ دانانا پرۆژەیێن فرۆتنا مریشكێن ساخ ل دهۆكێ، بەلێ هێشتا چو پرۆژە دەست ب كار نەبووینە.
باسنيوز
