جێگری سه‌رۆكی كۆمسیۆنی باڵای سه‌ربه‌خۆی هه‌ڵبژاردنه‌كانی عێراق گوتی، ئه‌مشه‌و بانگه‌شه‌ی هه‌ڵبژاردنه‌كان ده‌ست پێ ده‌كات و هه‌ر قه‌واره‌یه‌كی سیاسی پێش ئه‌و واده‌یه‌ بانگه‌ش بكات سزا ده‌درێت. ئاماژه‌یشی دا، هه‌ركه‌سێك به‌شداریی له‌ پرۆسه‌ی بایۆمه‌تری كردبێت، پێویسته‌ كارتی ده‌نگدانی هه‌بێت، ئه‌گه‌رنا بێبه‌ش ده‌بێت له‌ ده‌نگدان و ئه‌گه‌ر به‌شداریی بایۆمه‌تری نه‌كردبێت، ده‌توانی به‌ كارتی كۆن ده‌نگ بدات.

بڕیاره‌ ئه‌مڕۆ سەعات 12ی شه‌و بانگه‌شه‌ی هه‌ڵبژاردنه‌كان له ‌هه‌رێمی كوردستان بۆ په‌رله‌مانی عێراق ده‌ست پێ بكات، كه‌ بڕیاره‌ هه‌ڵبژاردنه‌كان له ڕۆژی 12ی ‌مانگی داهاتوو به‌ڕێوه‌ بچن و بانگه‌شه‌كه‌ش تاوه‌كو 24 سەعات پێش ده‌ستپێكردنی پرۆسه‌ی هه‌ڵبژاردنه‌كان به‌رده‌وام ده‌بێت.

ڕزگار حه‌مه‌ ئه‌مین، جێگری سه‌رۆكی كۆمسیۆنی باڵای سه‌ربه‌خۆی هه‌ڵبژاردنه‌كانی عێراق، به ‌ماڵپه‌ڕی فه‌رمیی پارتی دیموكراتی كوردستانی ڕاگه‌یاند: "ژماره‌یه‌ك‌ قه‌واره‌ و كاندید پێش ده‌ستپێكردنی پرۆسه‌ی بانگه‌شه‌ی هه‌ڵبژاردن پۆسته‌ر و وێنەیان بڵاو کردووەتەوە‌ و لیژنه‌ی چاودیریی ئێمه‌ ناوی ئه‌و كه‌سانه‌یان تۆمار كردووە و ئێمه‌یان ئاگادار كردووەتەوە، بۆیه‌ ئێمه‌ش سزامان داون، كه‌ ژماره‌یان 10 كاندید ده‌بێت، به‌ڵام هیچیان له‌ هه‌رێمی كوردستان نه‌بوونه‌."

له‌باره‌ی ده‌ستپێكردنی بانگه‌شه‌ی هه‌ڵبژاردنه‌كانەوە، ڕزگار حه‌مه‌ ئه‌مین گوتی: "ئه‌مڕۆ له ‌پارێزگاكانی عێراق ده‌ستی پێ كردووه‌، به‌ڵام بۆ هه‌رێمی كوردستان له‌ سەعات 12:00ی شه‌و ده‌ست پێ ده‌كات و هه‌ركه‌سێك پێش ئه‌و واده‌یه‌ ده‌ست پێ بكات سزا دەدرێت."



ڕزگار حه‌مه‌ ئه‌مین گوتیشی: "سزای هه‌ر كاندیدێك سه‌رپێچی بكات سێ ملیۆن دیناره‌ و بۆ قه‌واره‌كانیش پێنج ملیۆن دیناره‌ و ئه‌گه‌ر دووباره‌شی بكاته‌وه‌ ده‌بێته‌ دووقات."



سه‌باره‌ت به‌ وه‌رگرتنه‌وه‌ی كارتی ده‌نگدان، ئه‌مین باسی له‌وه‌ كرد: "پرۆسه‌ی وه‌رگرتنه‌وه‌ی كارتی ده‌نگدان له‌ هه‌رێمی كوردستان، له ‌هه‌ولێر 51% و له ‌سلێمانی 52% و له‌ دهۆك 43% بووە، بۆیه‌ ئه‌وه‌ی به‌شداری له‌ پرۆسه‌ی بایۆمه‌تری كردووه،‌ پێویسته‌ كارتی ده‌نگدانی وه‌رگرێته‌وه،‌ ئه‌گه‌رنا بێبه‌ش ده‌بێت له ‌ده‌نگدان، به‌ڵام ئه‌وه‌ی به‌شداریی له‌ پرۆسه‌ی بایۆمه‌تری نه‌كردبێت ده‌توانێ به‌ كارتی كۆن ده‌نگ بدات."


kdp _