یەکێتیی نیشتمانیی کوردستان لە چوارچێوەی ئەو پرۆسەی بەناوی (هەڵمەتی پاککردنەوەی ڕیزەکانی یەکێتی) دەستی پێکردووە، پێنج بەرپرسی پلە جیاوازی خۆی دەرکرد.

بەپێی ئەو بەڵگانەی کە لە میدیای فەرمیی یەکێتیدا بڵاو کراوەتەوە، لە دوو بڕیاری جیاوازدا کە ڕۆژانی ١٠ و ١١ی نیسانی ٢٠١٨ دەرکراوە، سێ کارگێڕی مەڵبەند و دوو ئەندامی کۆمیتەی حزبەکە “دەرکراون”.

هاوکات ئەوە ئاشکرا کراوە کە هۆکاری دەرکردنەکەیان بۆ پەیوەندیکردنی ئەو بەرپرسانە بە “لایەنێکی تر” و کارکردن بۆ لیستێکی دیکە دەگەڕێتەوە.

پێشتر مەکتەبی سیاسیی یەکێتی لە کۆبوونەوەی ڕۆژی ١-٤-٢٠١٨، بڕیاری ئەوەی دەرکرد کە هەر سەرکردە و بەرپرسێکی یەکێتی لایەنگیری لە بەرهەم ساڵح بکەن، لەنێو حزبەکەدا دەردەکرێن. لە ڕۆژی ٨ی نیسانی ٢٠١٨شدا ٨ جێگری بەرپرسی مەڵبەند و کارگێڕی مەڵبەند و ئەندامی کۆمیتە لە ڕیزەکانی یەکێتی دەرکران.

هەر لەبارەی دەرکردنی ئەو کەسانەوە، مەلا بەختیار، لێپرسراوی دەستەی کارگێڕیی مەکتەبی سیاسیی یەکێتی ئاشکرای کردووە کە جگە لە دەرکردنیان، موڵک و ماڵی یەکێتییان لێ دەسەننەوە و مووچەی یەکێتیشیان لێ دەبڕن.











باسنيوز