د.عەلى دولەمەرى، نوونەرێ حکومەتا هەرێما کوردستانێ ل فرەنسا راگەهاند، هەرێما کوردستانێ ب پالپشتیا فرەنسا هاتیە دامەزراندن و ب سەقامگیریا هەرێمێ دێ عیراق ئارام بیتەڤە، جونکە هەرێما کوردستانێ شەر دژى تیرۆرستێن داعشێ ب سەرکەفتیانە تۆمارکر و ب تایبەت پشتى داعشێ چەندین هێرش کرینە فرەنسا.

لدووڤ روودانێن 16 ئێکتوبەرا 2017ێ، حکومەتا عیراقێ رابوو ب دوورپێچکرنا هەرێما کوردستانێ ژلایێ لەشکەرى و ئابۆرى ڤە، بەلێ لگۆر ڤشارا چەندین وەلاتێن زێلهێز حکومەتا عیراقێ هەلویستێ خۆ بەرامبەر هەرێما کوردستانێ گهورى و ئێکەم پێنگاڤ ڤرۆکخانەیێن هەرێمێ ڤەکرن، د.عەلى دولەمەرى، نوونەرێ حکومەتا هەرێما کوردستانێ ل فرەنسا، بۆ مالپەرێ فەرمیێ پارتى دیموکراتى کوردستان گۆت:" پشتى حکومەتا عیراقێ رابوویى ب ئابلوقکرنا هەرێما کوردستانێ ژ روویێ ئابۆرى و سیاسى و دبلوماسى، حکومەتا هەرێمێ داخوازا کر کیشەیێن دناڤبەرا هەر دوو حکومەتاندا ب رێکا دستورى چارەسەر بکن، ژبەر هندێ وەلاتێن ئورۆپى وەک فرەنسا و ئەلمانیا پێشخەر بووینە کۆ هاریکاریا هەرێما کوردستانێ بکەن و فشارێ بێخنە لسەر حکومەتا عیراقێ بۆ بجهئینانا دستورى، جونکى سەقامگیریا عیراقێ نائیتە بجهئینان بیێ سەقامگێریا هەرێما کوردستانێ و ئەڤ هەولە وەلاتێن ئۆروپى ئەنجامدان داکو مافێن کوردا نەئێنە بەرزەکرن".

نوونەرێ حکومەتا هەرێما کوردستانێ ل فرەنسا زەلالکر:" عیراق لسەر بنەمایێ حکومەتا هەڤپشک بهێتە ئاڤکرن، ژبەر ڤێ ئێکێ وەلاتێن ئورۆپى و ب تایبەت حکومەتا فرەنسا فشار ئێخستە سەر حکومەتا عیراقێ سەرپێچیا دستور نەکەت و ئێکەم پێنگاڤ ڤرۆکخانەیێن هەرێما کوردستانێ هاتنە ڤەکرن".

عەلى دولەمەرى خویاکر:" دڤێت ژبیر نەکەین دەمێ هەرێما کوردستانێ هاتیە دامەزراندن لسەر بریارا جڤاتا ئاسایشا نەتەوەیى ب پێشتەڤانیا فرەنسا بوو و پاراستنا هەرێما کوردستانێ گەلەک گرنکە بۆ فرەنسا، ژبەر پێشمەرگەێ کوردستانێ شیا هێرشێن داعشێ تێکبشکینیت پشتى داعش چەندین هێرش کرینە سەر وەلاتێ فرەنسا و بوویە مەترسى لسەر ئێمناهیا وێ، دیسان فرەنسا ب ئەرکێ خو دزانیت پێشتەڤانیا هەر چوار پارچەیێن کوردستانێ دکەت".

دولەمەرى بەحسکر، فرەنسا دزانیت حکومەتا عیراقێ سەقامگیریێ ل رۆژهەلاتا ناڤین پەیدا ناکەت، ژبەر هندێ عیراق و سوریا گەلەک دگرنگن بۆ وەلاتێن ئۆروپى ب تایبەت پشتى داعشێ هێرشکرینە وەلاتێن ئورۆپى و تا ئەڤ وەلاتە سەقامگیر نەبن دێ مەترسى لسەر وەلاتێن ئورۆپا هەبیت و نوکە سەقامگیریا عیراق ب ساناهیترە ژ سوریا، جونکى عیراق خودان دستورە و مافێن هەمى پێکهاتەیێن عیراقێ تێدا بەحسکرینە، ل داهاتى دێ سەقامگیریا ڤان دەڤەران ئێتەکرن ب تایبەت ژروویێ ئیمناهیا جڤاتا دەولى و پەنابەر و ئاواراندا".
kdp -