جێگرى سه‌رۆكى یه‌كێتیى مامۆستایانى كوردستان ده‌ڵێت، له‌ پێناو به‌رژه‌وه‌ندى مامۆستایان و پاراستنى مافه‌كانیان،سه‌رقاڵى ئاماده‌كردنى پڕۆژه‌ یاساى پارێزبه‌ندى مامۆستایانین،هاوكات له‌ سكاڵاى هه‌موو ئه‌و مامۆستایانه‌ش ده‌كۆڵینه‌وه‌ كه‌ توندوتیژییان به‌رانبه‌ر ده‌كرێت.



عه‌تا ئه‌حمه‌د، جێگرى سه‌رۆكى یه‌كێتیى مامۆستایانى كوردستان ڕاگه‌یاند: "بۆ هه‌موو ئه‌و توندوتیژیانه‌ى كه‌ به‌رانبه‌ر مامۆستایان كراوه‌ یان ده‌كرێت ئاماده‌كاری ته‌واو ده‌كه‌ین له‌ڕووی یاساییه‌وه‌ و پارێزه‌ر بۆ هه‌ر سكاڵاكارێك دابین ده‌كه‌ین".



گوتیشى: "سه‌رقاڵى ئاماده‌كردنى پرۆژه‌ یاسایه‌كین به‌ناوی (پارێزبه‌ندی یاسایی) بۆ مامۆستایان و دواى ته‌واوكردنى به‌مه‌به‌ستى كارى پێویست ئاراسته‌ى په‌رله‌مانی كوردستانى ده‌كه‌ین".



جێگرى سه‌رۆكى یه‌كێتیى مامۆستایانى كوردستان ڕاشیگه‌یاند: "به‌ده‌ر له‌وه‌ش سه‌رقاڵى پرۆژه‌یه‌كین كه‌ ناوه‌ڕۆكه‌كه‌ى بریتییه‌ له‌ دامه‌زراندنى مامۆستایانی گرێبه‌ست به‌ هه‌میشه‌یى، هه‌روه‌ك مامۆستایانی وانه‌بێژیش گرێبه‌ستیان له‌گه‌ڵدا بكرێت،دواى ته‌واوكردنى و به‌مه‌به‌ستى په‌سندكردنى ، پڕۆژه‌كه‌ ده‌ده‌ینه‌ وه‌زاره‌تى په‌روه‌رده‌ى حكوومه‌تى هه‌رێمى كوردستان".
bas news-