ئەندامێکی فراکسیۆنی پارتی دیموکراتی کوردستان لە پەرلەمانی عێراق ئاشکرای کرد، سەلیم شووشکەیی، پەرلەمانتارێکی کۆمەڵی ئیسلامی ٤ ساڵە دوو قسەی لە ناو پەرلەمانی عێراق لەبەرژەوەندیی خەڵکی کوردستان نەکردووە کەچی ئێستا چووەتە نێو خۆپیشاندەرانەوە.

دوای ئەوەی لە خۆپیشاندانەکەی ئەمڕۆ یەکشەممە 25/3/2018، سەلیم شووشکەیی، پەرلەمانتاری کۆمەڵ کە کاندیدی هەڵبژاردنی داهاتووی پەرلەمانی عێراقە و لەگەڵ ژمارەیەک کاندیدی دیکە، بە مەبەستی بانگەشەی هەڵبژاردن، چوونە نێو خۆپیشاندەرانی هەولێر. شاخەوان عەبدوڵا، ئەندامی فراکسیۆنی پارتی لە پێگەی تایبەتیی خۆی لە تۆڕی کۆمەڵایەتیی (فەیسبووک) نووسیویەتی: ”ئەمڕۆ بینیم سەلیم شوشکەیی لەناو خۆپیشاندەرانە، بڕوا بکەن ماوەی ٤ ساڵە دوو قسەی لەناو پەرلەمانی عێراق نەکردووە لە بەرژەوەندیی خەڵکی شارەکەی و کوردستانیش“.

داواشی لە هەر کەسێک کردووە کە ئەگەر بەڵگەیەکی هەیە لەسەر قسەکردنێکی سەلیم شووشکەیی لەنێو پەرلەمانی عێراق، وەڵامی بداتەوە.

هاوکات پرسیاری ئەوەی کردووە: ”باشە بۆ دەچیتە ناو خۆپیشاندەران و داوا رەواکەی ئەوانیش ناشرین دەکەی و بەحزبی دەکەن؟“.

ئەو پەرلەمانتارەی فراکسیۆنی پارتی ئاماژەی بەوە داوە کە خۆپیشاندان مافی هەموو موچەخۆرانە و ئەرکی حکوومەتیشە داواکەیان جێ بەجێ بکات، چونکە بارودۆخی خەڵک لەوپەری خراپیدایە. هاوکات پێشنیاز دەکات، سەرجەم بەرپرسان منداڵەکانیان لە قوتابخانە ئەهلییەکان دەربهێنن، ”بۆ ئەوەی هەست بە مەعاناتی مامۆستا و بێبەش بوونی نەوەکانیان لە خوێندن بکەن“.










باسنيوز