بەڕێوەری دەزگای راپرسیی MAK لە توركیا، لە تازەترین راپرسیدا ئاشكرای دەكات، یەكێك لەو هۆكارانەی وای كردووە لە هەڵبژاردنی سەرۆكایەتی و پەرلەمانی 2019ی توركیادا كوردەكان دەنگ بە ئەردۆغان نەدەنەوە، ئەو ناكۆكیەیە كە لە سەروبەندی ریفراندۆم بۆ سەربەخۆیی هەرێمی كوردستان، ئەردۆغان لەگەڵ بارزانیدا دروستی كرد.

دەزگای راپرسیی MAK، یەكێكە لە دەزگا بەناوبانگەكانی توركیا، هەروەها لە زۆربەی هەڵبژاردنەكاندا پێشبینی و راپرسییەكانی بە هەند وەرگیراوە.

ئەحمەد تاكان نووسەری دیاری (یەنی چاغ)ـی توركی، لە وتاری ئەمڕۆیدا نووسیویەتی، پەیوەندی بە محەمەد عەلی كولاتەوە كردووە، كە بەڕێوەبەری دەزگای راپرسی MAK یە و لێی پرسیوە لە تازەترین راپرسیتاندا ئاكپارتی حاڵی چۆنە؟ ئەو گوتوویەتی ئاكپارتی 40%ی دەنگەكان دەهێنێت و مەهەپەش 7%ی دەنگەكان دەهێنێت.

باسی لەوەش كردوە، كە باكوورییەكان دەنگ بە ئاكپارتی و ئەردۆغان نادەنەوە، ئەمەش چەند هۆكارێكی لە پشتە و یەكێك لە هۆكارەكان پەیوەندی بە مەسعوود بارزانی سەرۆكی هەرێمی كوردستانەوە هەیە.

تاكان دەنووسێت: "عەلی كولات پێی گوتم، لە سەروبەندی ریفراندۆم بۆ سەربەخۆیی هەرێمی كوردستان، ئەو ناكۆكییەی ئەدرۆغان لەگەڵ بارزانیدا دروستی كرد، بەشێكی كوردەكان لەبەر ئەوە دەنگ بە ئەردۆغان نادەنەوە و لێی تووڕەن".

هەروەها باس لەوەش دەكات، كە هەرچەندە ئێستا وا دەبینرێت كە پەیوەندیی نێوان توركیا و هەرێمی كوردستان بەرەو باشی دەچێت، بەڵام بەشێكی كوردەكان لەبەر ئەو هۆكارە هەر دەنگ بە ئەردۆغان و ئاكپارتی نادەنەوە.








باسنيوز