بە بڕیاری حکوومەت، چەند جۆرە رسووماتێک کە زیاد کرابوون، کەم کراونەتەوە، لەوانە رسووماتی شارەوانییەکان و شوێنە گەشتیارییەکان و تۆماری کۆمپانیاکان. بەرپرسێکیش ئاشکرای دەکات، پێداچوونەوە بە کەمکردنەوەی رسووماتی تاپۆش دەکرێت.



عەبدولحەمید مەجید، بەرێوەبەری گشتیی پلاندانان لە وەزارەتی شارەوانیی حکوومەتی ھەرێمی کوردستان، بە (باس)ی راگەیاند، بڕیاری کەمکردنەوەی رسوومات لەم مانگەوە جێبەجێ دەکرێت، گوتی: ”ئەو رسووماتانەی شارەوانی وەری دەگرێت کە بریتین لە رسوومانی پیشە و رێکلام و تابلۆ ھەڵواسین و شوێنە بازرگانی و پیشەسازییەکان، لەو مانگەوە کەمکردنەوەکەیان دەچێتە واری جێبەجێکردنەوە“..



کەمکردنەوەی رسووماتی شارەوانییەکان لەو شوێن و پیشە جۆراوجۆرانە بە جۆرێکە لەنێوان ١٠% بۆ ٥٠% و لە سەرەتای ئەمساڵەوە جێبەجێ دەکرێت.



بەرپرسەکەی وەزارەتی شارەوانی جەختی کردەوە، رێژەیەکی باشی رسووماتەکان کەم کراونەتەوە، بە جۆرێک بگونجێت لەگەڵ دۆخی ئێستای ھاووڵاتییان، گوتیشی: ”رسووماتی تابلۆ و خۆڵ و خاشاکی نۆرینگە پزیشکییەکان و کرێی ناوچە پیشەسازییەکان و تابلۆی دوکان و شوێنە بازرگانییەکان و ھەموو جۆرە تابلۆکانی کارکردن دەگرێتەوە، کە پێشووتر گلەیی زۆری لەبارەوە دەکرا“.



ئەو رسووماتانەی کەم کراونەتەوە زیاتر لە ٦٠ شوێن و پیشەی جۆراوجۆری تێدایە.



روونیشی کردەوە، تا ئێستا وەرگرتنی پارە لەبری کۆکردنەوەی زبڵ و خاشاک لە ماڵان نەچووەتە واری جێبەجێکردنەوە و ئەو کارە سپێردراوە بە شارەوانییەکان.



لە سەرێکی ترەوە، بەفەرمی کرێ و رەسمی ھوتێل و مۆتێل و شوێنە گەشتیارییەکان لەنێوان ٢٥% بۆ ٥٠% کەم کراوەتەوە، بۆ نموونە ھەندێک شوێن لە ٣ ملیۆن دیناری ساڵانە بووەتە ٢ ملیۆن دینار.



ئامانج رەحیم، سکرتێری ئەنجومەنی وەزیران رای گەیاند، لە کۆبوونەوەی ئەنجومەنی وەزیران، بڕیار درا رسووماتەکان کەم بکرێنەوە، بڕیارەکەش کەوتووەتە واری جێبەجێکردنەوە.



دوووپاتیشی کردەوە، بەشێوەیەکی گشتی، رسووماتەکان کەم دەکرێنەوە و ھەندێ لەو رسووماتانە تا ئاستی ٥٠% کەم کراونەتەوە.



روونیشی کردەوە، باجی تۆمارکردن و نوێکردنەوەی مۆڵەتی کۆمپانیاکان، رسووماتی فڕێدانی زبڵ و خاشاک و ھەڵواسینی تابلۆ پێداچوونەوەیان پێدا کراوە، ھەندێک رسووماتی تریش پێداچوونەوەی پێدا دەکرێت.



ئامانج رەحیم ئاشکراشی کرد، داوایان لە وەزارەتی داد کردووە پێداچوونەوە بە رسووماتی تاپۆکردن و گواستنەوەی موڵکداریی زەوی و خانووبەرەشدا بکات.



سامان بڵباس، سەرۆکی شارەوانیی ھەولێر بە (باس)ی راگەیاند، بە بڕیاری ئەنجومەنی وەزیران پێداچوونەوە بە رسووماتەکانی شارەوانیدا کراوە و بڕیارەکە لەو مانگەوە جێبەجێ دەکرێت.



گوتیشی: ”رسوومات بە رێژەیەکی زۆر کەم بووەتەوە، ئێمەش کاری پێ دەکەین“.



لە لای خۆشیەوە دڵزار ئیسماعیل، بەڕێوەبەری گشتیی تۆماری کۆمپانیاکان بە (باس)ی راگەیاند: ”رسووماتی تۆماری کۆمپانیاکان زۆر کەم کرایەوە و وەکوو پێشووی لێ کرایەوە، بە شێوەیەک سەدا سەد و پەنجا کەم کرایەوە، ئەوەش کاریگەریی لەسەر زیادبوونی تۆماری کۆمپانیاکان کردووە“





باسنیوز