ل شەڤا چارشەمبی و ھەتا نیڤرۆیا رۆژا پێنچشەمبی، شەپۆلەکا مەزن یا بەفر بارینێ ب سەر چیایێ پیرس دا ھاتیە و بوویە ئەگەرێ داخستنا رێکا 100 گۆندێن دەڤەرا بارزان و زێباریان.

شەعبان خەلیل، رێڤەبەرێ ناحیا دینارتە دیار کر، ھەتا ئەڤرۆ رۆژا پێنچشەمبی ژی ل دەمژمێر 11 بەفر بارین ل دەڤەرا وان یا بەردەوام بوو و ببوو ئەگەرێ داخستنا رێکا 100 گۆندان و رێکا چیایێ پیرس ژی ب تمامی ھاتبوو داخستن.

گۆتیشی: ئەڤە دەمژمێرەکە تیمێن رامالینا بەفرێ دەست ب کارێ خۆ کریە و رێکا وان 100 گۆندان ب تمامی ھاتە ڤەکرن و نھا ھاتن و چوون ئاسایی بوویە ڤە.

دێوالی حەمێ بریندار، رێڤەبەرێ سەخبێری و رێک و پرا ل پارێزگەھا دھۆکێ ئاشکرا دکەت کو ئەڤرۆ 7 تیمێن رامالینا بەفرێ ل سەرانسەری پارێزگەھا دھۆکێ دەست ب ڤەکرن و رامالینا بەفرێ کرینە.

ئالی دیتر، ئۆمێد مەعسووم مایی، دیارکر، ل شەڤا بۆری پێلەکا مەزن یا سارمایێ ل سەر پارێزگەھا دھۆکێ دا ھاتیە و ب تایبەت ل دەڤەرێن چیایی و د ئەنجام دا، پتر ژ پێنچ سەنتیمێن بەفرێ ل ناحیا کانی ماسی ب سەر قەزا ئامێدیێ و ھژمارەکا مەزن یا گۆند و دەڤەرێن دەوروبەری وێ ڤە بارینە و ل خالا گۆمرکی یا سەرزێری ژی 10 سەنتیمێن بەفرێ بارینە.









باسنیۆز