کوتلە کوردستانییەکانی پەرلەمانی بەغدا جەخت دەکەنەوە، ئەگەر تێبینییەکانیان لە ناو پرۆژەیاسای بوودجەی ئەمساڵی عێراقدا لەبەرچاو نەگیرێت، بایکۆتی دانیشتنەکە دەکەن. ئەوان مەرجێکیان بۆ نۆ مەرجەکەی پێشووی خۆیشیان زیاد کردووە.

بەر لە کۆبوونەوەی ئەمرۆی پەرلەمانی عێراق، سەرۆکایەتیی پەرلەمان لەگەڵ سەرۆکی کوتلەکان کۆ دەبێتەوە و، قسە لەبارەی پڕۆژەیاساکانی بوودجە و هەڵبژاردنەکان و کێشەکانی بەردەم ئەو دوو پرۆژەیاسایە دەکرێت.
نەدا مێرگەسۆری بڕیاردەری فراکسیۆنی پارتی دیموکراتی کوردستان، ئەگەری بەڕێوەچوونی کۆبوونەوەی پەرلەمان و خوێندنەوەی یەکەم بۆ دوو پرۆژەیاساکە، بە دەرەنجامی کۆبوونەوەی سەرۆکایەتیی پەرلەمان و کوتلەکان دەبەستێتەوە.

مێرگەسۆری بە ماڵپەڕی فەرمیی پارتی دیموکراتی کوردستان دەڵێ، "هەڵوێستی یەکگرتووی کوتلە کوردستانییەکان ئەوەیە ئەگەر تێبینییەکانمان لەناو پرۆژەیاسای بوودجەدا لەبەرچاو نەگیرێت، کۆبوونەوەکە بایکۆت دەکەین و رێگە نادەین رێژەی یاسایی بۆ بەڕێوەچوونی کۆبوونەوەکە تەواو بێت."
پێشتر کورد لە نۆ خاڵدا تێبنییەکانی خۆی لەبارەی ئەو پرۆژەیاسایەوە گەیاندووەتە سەرۆکایەتیی پەرلەمان و سەرۆکوەزیران حەیدەر عەبادی. جیا لەوەش داوایان کردووە بەر لەوەی خوێندنەوەی یەکەم بۆ پرۆژەیاساکە بکرێت، عەبادی لە کۆبوونەوەی پەرلەماندا بەشدار بێت و وەڵامی تێبینی و پرسیارەکانی پەرلەمانتاران بداتەوە.

پێکهاتەی سوننەش بە تەواوی تێبینی لەسەر پرۆژەیاسای بوودجە هەیە و پەرلەمانتارانی پارێزگای بەسرەش هەر لەو بەرەیەدان، بۆیە تا ئێستا نەتوانراوە رێژەی یاسایی بۆ کۆبوونەوەی تایبەت بە پرۆژەیاساکە تەواو بێت.
سوننەکان تێبینییان لەسەر پرۆژەیاسای هەڵبژاردنەکانی عێراقیش هەیە و پێیان وایە، بەو هۆیەی بەشی زۆری ناوچەکانیان وێران بوونە و خەڵکەکانیان ئاوارەن، بە تەواوی کاریگەری لەسەر رێژەی دەنگەکانیان دەبێت.
نەدا مێرگەسۆری دەڵێ، "سەرەڕای ئەوەی ناوی قەوارە و لیستەکان تۆمار کراون، بەڵام دەنگێکی بەهێز بۆ دواخستنی هەڵبژاردنەکان هەیە، بە تایبەت لە ناو سوننەکاندا."
سەرۆکایەتیی ئەنجوومەنی وەزیرانی بەغدا رۆژی ١٢ی ئایاری ئەمساڵی بۆ بەڕێوەچوونی هەڵبژاردنی پەرلەمانی عێراق و ئەنجوومەنی پارێزگاکان دیاری کردووە. هەروەها کۆمسیۆنی باڵای سەربەخۆی هەڵبژاردنەکانی عێراقیش جەختی کردووەتەوە، ئەمڕۆ یەکەشەممە، دوادەرفەتە بۆ تۆمارکردنی ناو لیست و قەوارەکان.
kdp-