پارێزگاری سلێمانی لەبارەی ئەو هێرشانەی لە تۆڕە کۆمەڵایەتییەکانەوە لەلایەن لایەنگرانی بزووتنەوەی گۆڕانەوە کرایە سەری، لە هێنانەوەی کۆسرەت ڕەسوڵ عەلی، جێگری یەکەمی سکرتێری گشتیی یەکێتیی نیشتمانیی کوردستان، وەڵامی هێرشەکانی دایەوە.



پاش ئەوەی ڕۆژی 6/1/2018، کۆسرەت ڕەسوڵ عەلی لە ڕێگەی فڕۆکەخانەی نێودەوڵەتیی سلێمانییەوە گەیشتەوە هەرێمی کوردستان و لەلایەن هەڤاڵ ئەبوبەکر، پارێزگاری سلێمانییەوە پێشوازی کرا و لە کاتی هاتنە خوارەوەیدا لە فڕۆکە، یارمەتی درا. لایەنگرانی بزووتنەوەی گۆڕان بە توندی لە تۆڕە کۆمەڵایەتییەکانەوە هێرشیان کردە سەر هەڤاڵ ئەبوبەکر و وەک چۆن هەر کەسێک کە بیانەوێت هێرشی دەکەنە سەر، بە هەمان شێوە هێرشیان کردە سەر پارێزگاری سلێمانی لە پشکی بزووتنەوەی گۆڕان.



لەمبارەیەوە هەڤاڵ ئەبوبەکر، پارێزگاری سلێمانی بە (باسنیوز)ی ڕاگەیاند: ”ئەگەر لایەنگرانی گۆڕان لە دیدی وێنەیەکەوە سەیری ئەو ھەڵوێستە دەکەن، من ڕێز لە بۆچوون و ڕەخنەی ھەموو کەسێک دەگرم“.



ئەوەشی ڕوون کردەوە کە ئەو بەرنامەی خۆی هەیە و ”دواجار ئەوان بۆیان دەردەکەوێت کە شکۆی مرۆڤی کورد، وەک شکۆی ھەر سەرکردەیەکی دیکە وایە و ڕێزگرتن لە ھەر کەسێک، لە ڕێزگرتن بۆ خۆم گرنگترە“.



دووپاتیشی کردەوە: ”کۆسرەت ڕەسوڵ نەبووایە، ھەر سەرکردەیەکی دیکە بووایە، بەو شێوەیە پێشوازیم لێ دەکرد“.

هەڤاڵ ئەبوبەکر نەیشاردەوە کە ”ڕەخنەی ھیچ کەس و لایەنێک“ ساردی ناکاتەوە، چونکە: ”من پارێزگاری ئەم شارەم و بە ئەرکی سەرشانی خۆمی دەزانم کە خزمەتی ئەم شارە بکەم و ڕێز لە ھەموو هاووڵاتییەک بگرم“.



پێشتر چەندان جار چاودێران و سیاسەتمەداران هۆشداریی ئەوەیان بە بزووتنەوەی گۆڕان داوە کە ڕاهێنانی لایەنگرانی لەسەر هێرشی میدیایی بەردەوام بۆ سەر حزب و لایەن و کەسایەتییە سیاسییەکان، لە داهاتوودا بە زیان بۆ خودی گۆڕان دەشکێتەوە و لە هەر ساتێکدا لایەنگرانی بزووتنەوەکە هەمان کار بەرامبەر بە گۆڕانیش ئەنجام دەدەن.




باسنیوز