ئەندامەکێ لیژنا ناڤخۆ ل پەرلەمانێ کوردستانێ ئاشکرا کر کو وان پرۆژە قانوونەک بۆ کێمکرن و نەمانا روودانێن ھاتن و چوونێ بەرھەڤکریە و ھەکە بھێتە پەسەندکرن، ھەتا سالا 2050 روودانێن ھاتن و چوونێ نامینن.



نازم کەبیر، ئەندامێ لیژنا ناڤخۆ ل پەرلەمانێ کوردستانێ، راگەھاند: "سالانە ھژمارەکا مەزن یا مرۆڤان ل کوردستانێ ب روودانێن ھاتن و چوونێ گیانێ خۆ ژ دەست ددەن و رێژەیەکا مەزن یا مرنا مرۆڤان ب روودانێن ھاتن و چوونێ یە، لەوما مە ب فەر دیت پرۆژە قانوونەکێ بەرھەڤ بکەین بۆ کێمکرن و نەمانا روودانێن ھاتن و چوونێ".



ئەڤ ئەندامێ لیژنا ناڤخۆ ل پەرلەمانێ کوردستانێ ئاشکرا کر، بۆ بەرھەڤکرنا ڤێ پرۆژە قانوونێ ھژمارەکا ئەندام پەرلەمان و لیژنەیان سەرەدانا وەلاتێ سوید کربوو و ھزر و راوبۆچوون ژ وێرێ ئینابوون بۆ مفا وەرگرتنێ و ل گۆرەی وی پرۆژە قانوونێ ھەکە بھێتە بجھئینان ھەتا سالا 2050 روودانێن ھاتن و چوونێ نامینن یان ژی ب رێژەیەکا گەلەک مەزن دێ کێمتر لێ ھێن.



ل دۆر ناڤەرۆکا پرۆژە قانوونێ خویا کر، کو ئێکەم پێنگاڤ پێدڤیە سیستەمێ دانا مۆلەتێن ھاتن و چوونێ ل ھەموو کوردستانێ ببنە ئێک و جوداھیا سیستەمێ دناڤبەرا رێڤەبەریێن ھاتن و چوونێ بۆ دانا مۆلەتێ نەمینیت، ھەروەسا دڤێت ھەموو وەزارەت ژی رۆلێ خۆ د کێمکرنا روودانێن ھاتن و چوونێ دا ببینن و نەکو ب تنێ خەما وەزارەتا ناڤخۆ بیت و گەلەک برگێن دی یێن گرنگ تێدا ھەنە.



نازم کەبیر، ئەندامێ لیژنا ناڤخۆ ل پەرلەمانێ کوردستانێ، دا زانین ژی کو ل گۆرەی پرۆژە قانوونا ھاتیە بەرھەڤکرن، ھەر شۆفێرەکێ روودانەکا ھاتن و چوونێ بکەت، جارا ئێکێ دێ ھێتە لێبوورین و ل جارا دوویێ ھەکە روودان دووبارە کر، دڤێت مۆلەتا ھاتن و چوونێ ژێ بھێتە کێشان.
bas news-