پتر ژ 50 خودانێن سەمۆنخانان ل قەزا زاخۆ ئەڤرۆ رۆژا سێشەمبی ل دانێ ئێڤاری خونیشاندانەک ل بەرامبەر قائیمقامیا قەزا زاخۆ ئەنجامدان و گەفێن داخستنا جھێن خوە کرن، ئەگەر ھات و حکوومەتا ھەرێمێ نەفتا سپی بۆ وان دابین نەکەت.



نەشوان تەیب، پشکدارێ خۆنیشاندانێ، بۆ (باسنیۆز) دیارکر: "ئەڤە ماوەیەکێ درێژە حکووومەتا ھەرێمێ بەلاڤکرنا نەفتا سپی ژ مە بڕیە و ڤێ ژی کارتێکرنەکا مەزن ل سەر مە کریە، چونکو ئێدی چو مفایێ مە د فرۆتنا سەمۆنان دا نەمایە، ئەگەر حکوومەت نەفتا سپی بۆ مە دابین نەکەت، ئێدی ئەم نەشێن کاربکەین و دێ سەمۆنخانێن خۆ دائێخین".



نەشوان، کو ئێک ژ خودان سەمۆنخانێن زاخۆیە ئەو یەک ژی دیارکر، ئەڤە چەندین جاران مە ب فەرمی سەرەدانا قائیمقامیا زاخۆ کر بۆ دابینکرنا نەفتا سپی، بەلێ قائیمقامیا زاخۆ دبێژیت مە نەفت نینە و نەشێین بدەینە ھەوە و ھەکە ھوسا بەردەوام بیت، ھەموو سەمۆنخانێن زاخۆ دێ ھێنە داخستن و نەشێن کاربکەن.



ئاشکرا ژی کر کو: "ئەڤە 12 سالە حکوومەتا ھەرێمێ نەفتا سپی ھەیڤانە ددەتە مە، ب وێ مەرەمێ مە بۆھایێ نان و سەمۆنان ئەرزانکریە، ژ نوو حکوومەت یا دبێژیت چاڤدێریا بازرگانیا دھۆکێ گۆتیە نەفتا سپی ئێدی نەدەنێ و ئەڤە بریارا پارێزگەھا دھۆکێ ژی یە، راگرتنا دانا نەفتا سپی بۆ سەمۆنخانە و نانپێژیان دێ زیانێ بۆ ھەموو خەلکێ پارێزگەھێ گەھینیت".



عەبدولڵا ماسیکی، رێڤەبەرێ چاڤدێریا بازرگانی ل پارێزگەھا دھۆکێ، دیارکر: "ھەتا ھەیڤا 12 ژ سالا 2017 ژی نەفتا سپی ل سەر خودانێن سەمۆنخانە و نانپێژیان ھاتیە دابەشکرن، چونکو ل ھەموو دووماھیا ھەیڤان نەفت بۆ وان دھێتە دابینکرن، بەلێ رەنگە بۆ ڤێ ھەیڤێ و ژ نھو وێڤە ئەڤ نەفتا سپی یا تایبەت بۆ سەمۆنخانە و نانپێژیان دچوو بھێتە بڕین".



ماسیکی ئاشکرا کر، کو پارێزگەھا دھۆکێ رەنگە ئەڤرۆ ھەتا سوبە ڤێ بڕیارێ ئێکلا بکەت کو ئێدی نەفتا سپی بۆ خودانێن سەمۆنخانە و نانپێژیان نەھێتە دان، چونکو پارێزگەە ھوسا ھزردکەت باشترە ئەو نەفتا ھەی بۆ خێزانێن پارێزگەھا دھۆکێ بچیت دێ پتر خزمەت ھێتە کرن ژ ھندێ بۆ سەمۆنخانە و نانپێژیان بچیت و ھژمارەکا مەزن یا نەفتێ بۆ سەمۆنخانە و نانپێژیان دچیت و حکوومەتێ رەنگە د شیان دا نەبیت ڤێ گازێ دابین بکەت.
bas news-