لەبەردەم نووسینگەی پەرلەمانی عێراق لە هەولێر دژ بە پشووكردنی یادی دامەزراندنی سوپای عێراق، گردبوونەوەیەك ساز درا.

رێباز یوسف، بەرپرسی تۆڕی رێكخراوە مەدەنییەكانی هەولێر و رێكخەری خۆپیشاندانەكە بە (كوردستان 24)ی ڕاگەیاند: "ئەمڕۆ 6/1/2018، ساڵیادی دامەزراندنی سوپای عێراقە، ئێمەش وەك تۆڕی رێكخراوە مەدەنییەكانی هەولێر گردبوونەوەیەكی ناڕەزایمان ئەنجام دا و لەو گردبوونەوەدا ویستمان بە حكوومەتی عێراق بڵێین كە پشووی فەرمی بە بۆنەی ساڵیادی دامەزراندنی سوپای عێراق هەڵبوەشتێتەوە، چونكە بە درێژایی مێژوو ئەو سوپایە دژ بە گەلی كورد وەستاوەتەوە و خەڵكی جینۆساید كردووە".

ڕێباز یوسف ڕاشی گەیاند: "ئێمە داوامان كرد رۆژێك بە فەرمی دابنرێت بۆ پێشمەرگە و وەك ڕۆژی نیشتمانی دابنرێت و ئێمە ڕاوێژمان لەگەڵ یاساناسان كردووە بۆ ئەوەی هەر لە چوارچێوەی بەیاننامەی ناڕەزایی هەوڵەكانمان نەمێنێتەوە و بۆ ئەوەی ئەو رۆژە وەک پشوو نەمێنێت و ڕۆژێکی دیکە بەناوی پێشمەرگەوە دیاری بکرێت و بیكەینە پرۆژە یاسا و لە پەرلەمانی كوردستان دەنگی لەسەر بدرێت".

بەرپرسی تۆڕی رێكخراوە مەدەنییەكانی هەولێر ڕوونیشی كردەوە: "دەمانەوێت ئەو رۆژەی كە وەك پشوو بۆ ساڵیادی دامەزراندنی سوپای عێراق دیاری كراوە لاببرێت و لە جێگەكەی ڕۆژێك بۆ پێشمەرگە دیاری بكرێت".









باسنيوز