بزاڤ یێ دھێنە کرن بۆ ئێکەم جار کۆنفرانسەک بۆ کاکەییان بھێتە کرن و تێدا چارەنڤیسێ کاکەیان د دەستوورێ عیراقێ و بەغدا دا بھێتە دیارکرن.

لیزا فەلەکەدین کاکەیی، چالاکڤان د بوارێ مافێن پێکھاتێن کوردستانێ دا و نڤیسەر د بوارێن پرسێن نەتەوەیی دا دیار کر، ئەم ل گەل وەزارە ئەوقافا حکوومەتا ھەرێما کوردستانێ د گفتۆگۆیێ داینە بۆ دەستنیشانکرنا رۆژەکێ بۆ ئەنجامدانا کۆنفرانسێ کاکەییان و د ڤێ کۆنفرانسێ دا دێ ھەمی کاکەییێن دەشتا نەینەوا ژی خۆ تێدا بینن.

لیزا ئاشکرا ژی کر، ل دویڤ قانوونا ھژمارە پێنچ، پووتەدانەکا مەزن ب کاکەییان و ھەمی پێکھاتێن ئۆلی ل ھەرێمێ ھاتیە دان، بەلێ مخابن ھەتا نھا حکوومەتا عیراقێ د دەستوورێ دا چ مافێن کاکەییان دیارنەکرینە و گۆت: ئەڤ کۆنفرانسێ دێ ھێتە ئەنجامدان، دەنگڤەدانا کاکەیان دێ دیاربیت و فشارێ ل سەر بەغدا کەت بۆ ئاشکراکرنا مافێن کاکەییان د دەستوورێ عیراقێ دا.

گۆت ژی: ئەو کاکەیێن ل دەشتا نەینەوا دژیان، نێزیکی 20 ھزار کەس بوون و پشتی ھاتنا داعش، ھەمی ئاوارەی ھەرێما کوردستانێ ببوون ولێ ئاکنجی ببوون، ھەروەسا ھژمارەکا مەزن یا کاکەیان ل کەمپا بەحرکەنە ل سنورێ ھەولێر، پشکا دی ژی ل باژێرێن ھەرێمێ دبەربەلاڤن.

لیزا کاکەیی دیار کر، ب شێوەکێ راستەوخو حوکمەتا عەبادی چو ھاریکاری بۆ کاکەیان نەکرینە، چونکو ھەر ژ ھەرێما کوردستانێ و دەستوورێ ھەرێما کوردستانێ ھێشتا گفتوگو ل سەرە، د دەستوورێ عێراقێ دا ھێشتا کاکەیی وەک پێکھاتەکێ ئاینی نەھاتیە ھژمارتن، ل ھەرێما کوردستانێ پرۆژەکێ پێشکێشکری ئەو پرۆژە یاسایەیە سەبارەت ب پێکھاتێن کوردستانێ دژین، کاکەیی وەک پێکھاتەکا ئاینی ھاتیە ھژمارتن.

لیزا فەلەکەدین ل دۆر رەوشا ژنێن کاکەیی ژی دیار کر، رەوشا وان ئافرەتێن ئاوارە یێن دناڤ کەمپان دان ھەتا رادەیەکێ کێم د رەوشەکا باش دانە، چونکو وەک پێدڤی ئەو داخوازیا ئافرەتێ دڤێت بۆ ناھێتەکرن.












باسنيوز