بەرپرسێ راگەھاندن و پەیوەندیان ل رێڤەبەریا پۆلیسێن پارێزگەھا دھۆکێ، راگەھاند، کو دوو پۆلیسێن (سکیورێتی) یێن فاملی مۆل ھاتینە دەستەسەرکرن و رەوانەکرن بۆ دادگەھێ، ب گونەھا بریندارکرنا دو گەنجان ل شەڤا سەرێ سالێ.

رائیدێ مافپەروەر ھێمن سلێمان، بەرپرسێ راگەھاندن و پەیوەندیان ل رێڤەبەریا پۆلیسێن پارێزگەھا دھۆکێ، گۆتی: "ل شەڤا سەرێ سالا 2018 ل فاملی مۆلا دھۆکێ، دو گەنجێن پارێزگەھا دھۆکێ بزاڤکرن بچنە سەر دارا سەرێ سالێ، بەلێ دوو پۆلیسێن (سکیورێتی) رێ ل وان گرت و ئەڤە ژی بوو ئەگەر شەر دناڤبەرا وان ھەردوو گەنجان و ھەردوو پۆلیسان دا پەیداببیت، د ئەنجام دا وان پۆلیسان ئەو ھەردوو گەنجە د شەری دا ب وی دارێ د دەستێ وان دا بریندارکرن".

بەرپرسێ راگەھاندن و پەیوەندیان ل رێڤەبەریا پۆلیسێن پارێزگەھا دھۆکێ، گوت ژی: "پشتی ھینگی وان ھەردوو گەنجان سکالا ل سەر وان پۆلیسێن (سکیورێتی) یێن فاملی مۆل تۆمارکر، د ئەنجامدا ب بڕیارا دادوەرێ ڤەکۆلینێ ھەردوو (سکیورێتی) ھاتنە دەستەسەرکرن و ل دویڤ بەندێ 413 ژ یاسایا سزایێن عیراقێ دێ ھێنە دادگەھکرن".

تێ زانین کو ڤیدیویا بریندارکرنا وان ھەردوو گەنجان دوو رۆژە د تۆرێن کۆمەلایەتی دا بەلاڤبووینە و رەنگڤەدانەکا مەزن ل دووڤ خۆ ھێلایە.












باسنيوز