ژنەک و کچەکا سنێلە ل سەنتەرێ پارێزگەھا دھۆکێ ب تاوانا دزینا زێرێ خێزانەکێ پشتی ب مەرەما خازۆکیێ چووینە د ناڤ وێ مالێ دا ژ ئالیێ پۆلیسێن دھۆکێ ڤە تێنە دەستەسەرکرن.

لیوا تارق ئەحمەد، رێڤەبەرێ پۆلیسێن پارێزگەھا دھۆکێ، دیارکر، پۆلیسێن نەھێلانا گۆنەھباریان ل پارێزگەھا دھۆکێ ژنەکا خازۆک ل گەل کچەکا سنێلە کو د بوو کچا برایێ وێ ب تاوانا دزیێ دەستەسەرکرن و بۆ دادگەھێ رەوانەکرن، بۆ ھندێ بگەھنە سزایێ خۆ یێ عادیلانە و ئێدی ئەڤ تاوانە بەر ب کێمیێ بچن.

ناڤبری ئاماژە دا وێ چەندێ، کو ڤێ ژنێ ھندەک زێر ب ھاریکارا کچا برایێ خۆ یا سنێلە ژ خێزانەکێ دزی بوون، پشتی ب مەرەما خازۆکی و ھەژاریێ چووینە د ناڤ تاخەکێ دھۆکێ دا و چووینە د ناڤ وێ مالێ دا و زێرێن وان دزین.

ژنا تاوانباری د دانپێدانێن خۆ دا چیرۆکا دزینا وان زێران ئاشکرا دکەت و دبێژیت: من کارێ خازۆکیێ دناڤ تاخێن باژێرێ دھۆکێ دا دکر، کچا برایێ من ژی د ژیێ 14 سالیێ دا ئەڤە دەمەک بوو ل گەل من کاردکر، ژ نشکەکێ ڤە ئەم چووینە د مالەکێ دا و کچا برایێ من ھندەک زێر ژ وێ مالێ دزین و ئەم بەرەڤ بازاری چووین، بەلێ ترۆمبێلەکێ ڕاھێلا مە و ئەم ل نێزیک بازاری ب ھاریکاریا پۆلیسێن نەھێلانا گۆنەھباریان دەستەسەرکرین.
bas news-