سەرۆکی شارەوانیی سلێمانی ڕای گەیاند، خەرجی شارەوانی سلێمانی لە ساڵی 2017 نزیکەی 42 ملیار و 199ملیۆن دینار بووە و داھاتەکەیش بڕی 10 ملیار و 500 ملیۆن دینار بووە گوتیشی، ئەمساڵ 11 پرۆژە جێبەجێ کراوە، کە خەرجییەکە دوو ملیار و شەسەد ملوێن دینار بووە.

ئەمڕۆ شەممە 30/12/2017 یووسف یاسین، سەرۆکی شارەوانیی سلێمانی لە کۆنگرەیەکی ڕۆژنامەوانیدا ڕای گەیاند، لە سەرەتای ساڵی 2017 دا ئێمە توانیومانە 450 ھەزار مەتر دووجا ڕووبەر قیرتاو بکەین و 54 ھەزار کۆنکرێتی کۆڵانەکان کراوە، ھەروەھا 2250 مەتر ئاو ڕاکێشراوە و 542 مەنھۆڵ پاک کراوەتەوە.

سەرۆکی شارەوانیی سلێمانی گوتیشی: "یەکێک لە کارە گرنگەکانی ئێمە زیادکردنی ڕێژەی سەوزایی بووە، خۆشبەختانە ئەمساڵ 536 باخ و 7 پارکی گەورە لە سنووری شارەوانیی سلێمانی بە شێوەیەکی بەرچاو سەوز کراوە و ھەوڵی ئەوەش دەدەین ھەلی کار بۆ نزیکەی 1500 گەنج دابین بکەین، بۆ ئەوەی لە پڕۆژەی سەوزکردنی شاری سلێمانیدا کار بکەن.

ئاماژەی بەوەش دا، پلانمان داناوە بۆئەوەی لە ساڵی 2018 چەندین پڕۆژەی ناوازە درووست بکەین، بڕیارمان داوە لە نزیک چاڤیلاند پارکی بۆنەکان دروست بکەین، کە ڕووبەرەکەی زیاتر لە 50 دۆنم زەوییە کە گەورەترین پارک دەبێت و زیاد لە 100 ھەزار ھاووڵاتی دەگرێت و زۆرترین ئۆتۆمبێل جێگەی دەبێتەوە، ھەروەھا لەگەڵ ژووری بازرگانی سلێمانی، بڕیارمان داوە شەش بازاڕی گەورەی میللی درووست بکەین.

سەرۆکی شارەوانی، ڕای گەیاند، لەسەر ئەنجامدانی زیادەڕۆیی دەیان سکاڵامان لەسەر بەرپرسان تۆمار کردووە، بێگومان ئێمە وەک شارەوانیی سلێمانی لە ھیچ کەسێک شەرم ناکەین، چونکە ئێمە کاری یاسایی خۆمان دەکەین، بۆیە ھەر کەسێک زیادەڕۆی بکات، ئەگەر بەپرس بێ یان ھاووڵاتییەک سڤیل ڕووبەڕووی یاسایی دەکەینەوە.










باسنیوز