وەزیری دەست لەکار کێشاوەی کشتوکاڵ و سەرچاوەکانی ئاوی حکوومەتی هەرێمی کوردستان، فۆرمێک ئاراستەی سەرجەم فەرمانبەرانی وەزارەتەکەی دەکات و هانیان دەدات بۆ ئەوەی داوای مانەوەی لە پۆستەکەی بکەن.

فۆرمەکە لەلایەن عەبدولستار مەجیدەوە بۆ سەرجەم فەرمانبەرانی وەزارەتی کشتوکاڵ لە تەواوی پارێزگاکانی هەرێمی کوردستان (هەولێر، سلێمانی، دهۆک و هەڵەبجە) نێردراوە و تێیدا فەرمانبەران هان دراون، واژۆ لەسەر داواکاریی ماناوەی عەبدولستار مەجید لە پۆستی وەزیری کشتوکاڵ و سەرچاوەکانی ئاو بکەن.

لەمبارەیەوە شاڵاو جەمال، بەڕێوبەری گشتیی کشتوکاڵی پارێزگای سلێمانی، ڕايگەیاند:" پێش ئەوەی عەبدولستار مەجید، وەزیری کشتوکاڵ دەست لەکار کێشانەوەی ڕابگەیەنێت، لە ڕێگەی دیوانی وەزارەتەوە فۆڕمی بۆ کارمەندان و فەرمانبەران و سەرجەم بەڕێوبەرایەتییەکانی پارێزگاکانی ھەرێمی کوردستان ناردووە، بۆ ئەوەی داوای مانەوەی وەزیری کشتوکاڵ لە پۆستەکەیدا بکەن“.

ئەوەشی ئاشکرا کرد کە فۆڕمەکە بۆ ئەوانیش چووە و داوای ئەوە کراوە کە ئەوانەی ”خۆشحاڵن“ بە مانەوەی عەبدولستار مەجید لە پۆستەکەیدا، فۆڕمەکە واژۆ بکەن و دواتر لە ڕێگەی یاداشتێکەوە بەرز بکرێتەوە. گوتیشی: ”ئێمە وەک بەڕێوبەرایەتیی گشتیی کشتوکاڵ و فەرمانبەرانی بەڕێوبەرایەتییەکەمان، واژۆمان لەسە ئەو فۆڕمە نەکردووە“.

عەبدولستار مەجید، لە پشکی کۆمەڵی ئیسلامی پۆستی وەزیری کشتوکاڵی پێ دراوە و دوای هەڵوێستی سیاسیی کۆمەڵ و بزووتنەوەی گۆڕان، دەست لەکار کێشانەوەی لە پۆستەکەی ڕاگەیاندووە.











باسنيوز