پەرلەمانتارێکی بزووتنەوەی گۆڕان لە پەرلەمانی عێراق بەیاننامەیەک دەردەکات و تێیدا داوای دەستوەردانی عێراق لە کاروباری ھەرێمی کوردستان دەکات.



رۆژی سێشەممە 16/12/2017، ھۆشیار عەبدوڵڵا، پەرلەمانتاری گۆڕان لە بەغدا، لە بەیاننامەیەکدا داوا لە ھاووڵاتییانی بەغدا، ناوەڕاست و باشووری عێراق دەکات، ”راپەڕین بکەن بۆ سەرخستنی خۆپیشاندەران“ی سنووری پارێزگای سلێمانی کە دەیان فەرمانگە و بارەگای حکوومەتی ھەرێمی کوردستان و ئۆتۆمبێلی هاووڵاتییانیان بە ناوی خۆپیشاندانەوە سووتانووە.



ھۆشیار عەبدوڵڵا بەبێ ئاماژەکردن بەوەی حکوومەتی عێراق گەمارۆی ئابووری خستووەتە سەر گەلی کوردستان و مووچەی فەرمانبەرانی کوردستان نانێرێ، رایگەیاندووە، بەھۆی درەنگکەوتنی مووچەی فەرمانبەرانی کوردستان، دەبێ حکوومەتی ھەرێمی کوردستان ھەڵبووەشێتەوە، کە ”داواکاریی خۆپیشاندەرانە“.



ئەو پەرلەمانتارەی گۆڕان گلەیی لە حکوومەتی عێراق و حەیدەر عەبادی، سەرۆک وەزیرانی ئەو وڵاتە دەکات، بەهۆی ئەوەی دەست لەکاروباری ناوخۆی ھەرێمی کوردستان وەرنادەن و ”خۆیان لە بەرپرسیارێتییەکانیان لە ھەرێمی کوردستان دەدزنەوە“.



پێشتریش تاڤگە ئەحمەد، ئەندامی فراکسیۆنی گۆڕان لە پەرلەمانی عێراق داوای لە عەبادی کردبوو، دەستێوەردان لە کاروباری هەرێمی کوردستان بکات.


باسنیوز