عێراق بە یاسای بەعس سزایەکی دیکە بەسەر کوردستاندا دەسەپێنێت
بەپێی زانیارییەکان، حکوومەتی عێراق نووسراوێکی ئاراستەی حکوومەتی ھەرێمی کوردستان کردووە و تێیدا داوای لە ھەموو کارگە و کۆمپانیا بەرھەمھێنەکانی کوردستان کردووە، لە بەغدا ناوی خۆیان تۆمار بکەن، تا بتوانن بەرھەمەکانیان بنێرنە عێراق.
عەبدولڕەزاق عوسمان ناوەندەیی، بەڕێوەبەری گشتیی دیوان لە وەزارەتی بازرگانی و پیشەسازیی حکوومەتی ھەرێمی کوردستان رایگەیاندووە، بەغدا لەو بڕیارەدا، پشتی بە یاسایەی ساڵی ١٩٩٨ـی رژێمی بەعس بەستووە.
ئەو ھەڵویستەی حکوومەتی عێراق بەرامبەر کۆمپانیا و کارگە بەرھەمھێنەکانی کوردستان، بەشێکە لەو سزا و گەمارۆیانەی بەغدا دوای ریفراندۆمی سەربەخۆیی کوردستان، بەسەر گەلی کوردستانیدا سەپاندووە.
رۆژی ٢٥ـی ئەیلوولی ٢٠١٧، گەلی کوردستان چوونە سەر سندووقەکانی دەنگدان و لە ریفراندۆمێکدا، و زیاتر لە %٩٢ـی دەنگدەران دەنگیان بە سەربەخۆیی کوردستان و جیابوونەوە لە عێراق دا. دوای ریفراندۆم، حکوومەتی عێراق چەندین سزا و گەمارۆی بەسەر کوردستاندا سەپاند، داخستنی فڕۆکەخانەکان و ھەوڵیشی دا کیانی کوردستان بە تەواوی لەناو ببات، بەڵام قارەمانێتیی پێشمەرگە ھێرشەکانی سوپا و میلیشیا عێراقییەکانی تووشی شکست کرد.
باسنيوز
