شارەزایەکی یاسایی دەڵێت، بە پێی یاسا بەغدا ناتوانێت بەشە بوودجەی ھەرێمی کوردستان کەم بکاتەوە، تا ئەوکاتەی سەرژمێری ئەنجام دەدرێت.


ئێستا غروورێکی پێوە دیارە و دەیەوێت ھەرێم لاواز بکات، لەمەش سەرکەوتوو نابێت، چونکە حکوومەتەکانی پێش ئەوانیش خۆیان تاقی کردووەتەوە، سەرکەوتوو نەبوونە.
بەغدا بەشە بوودجەی ھەرێمی کوردستانی لە ١٧% بۆ ١٢.٦٧% کەم کردووەتەوە بەبێ ئەوەی پرس بە ھەرێمی کوردستان بکات، لەکاتێکدا ڕێککەوتن کراوە تا سەرژمێریی گشتی ئەنجام دەدرێت بەشە بوودجەی ھەرێم ١٧% دەبێت. شارەزای یاسایی، (د. ئەحمەد وەرتی) بە ماڵپەڕی فەرمیی پارتی دیموکراتی کوردستانی ڕاگەیاند: ''ئەو گۆڕانکارییانەی بەغدا کردوونی، تاکلایەنە کردوونی، بەبێ گەڕانەوە بۆ ھەرێمی کوردستان، چونکە کاتی خۆی ڕێککەوتنێک کراوە، تاوەکو سەرژمێری دەکرێت بەشە بوودجەی ھەرێم بە ١٧% خەمڵێندراوە و ساڵانە بەو شێوەیە دراوە، ئەمساڵ حکوومەتی عێراق بە قۆستنەوەی دۆخی ئەم دواییە وا ھەست دەکات، ھەڵوێستی ھەرێم لاوازە، بۆیە پشکی ھەرێمی بۆ ١٢.٦٧% کەم کردووەتەوە، ئەمەش کە کراوە حکوومەتی عێراق بۆی نییە، بەشە بوودجەی ھەرێم کەم بکاتەوە، بەبێ ئەوەی سەرژمێری بکات و نازانرێت ژمارەی دانیشتووان چەندە، بۆیە ئەمەی عێراق کردوویەتی نایاساییە.''

(د. ئەحمەد وەرتی) گوتی: ''حکوومەتی عێراق لەخۆیەوە بەشە بوودجەی ھەرێمی کوردستانی کەم کردووەتەوە کە نایاساییە، چونکە نازانێت ژمارەی دانیشتوانی ھەرێم چەندە و ئەو بڕیارەی داوە.''

لەبارەی ھۆکاری ئەوەی بەغدا ئەو ھەنگاوەی ناوە، (وەرتی) گوتی: ''بەغدا و بەتایبەت سەرۆکوەزیران غروورێکی پێوە دیارە و ئێستا وا ھەست دەکات سەرکەوتووە، بۆیە ئەو ھەنگاوەی ناوە و بەدەرفەتی دەزانن بوونی خۆیان بسەلمێنن بە شێوەی سەربازی و گەمارۆی ھەرێم لە ڕووی ئابووری و سیاسییەوە لاواز بکەن و ھەرێم لاواز بێت، بەڵام ئەوان بەم جۆرە عەقڵییەتە ھیچ کاتێک سەرکەوتوو نابن، لەبەر ئەوەی ئەزموونی عێراق ئەوەی سەلماندووە، سەرکەوتووش نەبوونە و حکومەتی لە ئەوان بەھێزتریش خۆی تاقی کردووەتەوە نەیتوانیوە، سەرکەوتن تۆمار بکات.''

سەبارەت بە ناوخۆی ھەرێمیش، (وەرتی) باسی لەوە کرد: ''پێویستە ئێمە لە نێوخۆماندا یەکھەڵوێست و یەکگرتوو بین، چونکە ئەگەر ئێمە یەکگرتوو نەبین لایەنە عێراقی و دەرەکییەکانیش مەرجەکانی خۆیان بەسەر ئێمەدا دەسەپێنن.''
kdp-