بەڕێوەبەری ئاساییشی دوبز ڕایدەگەیەنێت، لە درێژەی پرۆسەی بەعەرەبكردنی پارێزگای كەركووك، لە شارۆچكەی دوبزیش بەعەرەبكردن دەستی پێ كردووە و، خەڵكێكی زۆری عەرەب ھێندراونەتە شوێنی ماڵە كوردەكان و داگیریان كردوون.

ڕائید (عەلی محەمەد)، بە ماڵپەڕی فەرمیی پارتی دیموكراتی كوردستانی ڕاگەیاند: ''دوای ھاتنی حەشدی شەعبی بۆ سنووری پارێزگای كەركووك، بەعەرەبكردن بە شێوەیەكی گشتی دەستی پێ كرد و، لە سنووری شارۆچكەی دوبزیش ئەو عەرەبانەی لە سەردەمی ڕژێمی بەعسدا ھاتبوونە سنوورەكە و دوای ٢٠٠٣ گەڕانەوە بۆ ناوچەكانیان، ئێستا جارێكی دیكە ئەو خەڵكە عەرەبە دەگەڕێنەوە بۆ دوبز و گوندەكانی دەوروبەری.''

ڕائید (عەلی) گوتی: ''ئەو خەڵكە عەرەبە كە دەگەڕێنەوە، بەشێكی دەچنە ماڵە كوردەكان، كە ئاوارە بوونە و داگیری دەكەن و بەشێكیشی دەچنە گوندەكانی دەوروبەری دوبز، بۆیە ھاتنیان بەردەوامە و خەڵكێكی زۆر ڕووی لە ناوچەكە كردووە.''

بەڕێوەبەری ئاساییشی دوبز ڕایشیگەیاند: ''حەشدی شەعبی دەستی بەسەر ھەموو ماڵەكانی ئێمە و بارەگاكاندا گرتووە و ئێستا ماڵەكەی من پۆلیسی فیدراڵی داگیری كردووە و، بارەگای ئاسایشیش حەشدی شەعبی دەستی بەسەردا گرتووە، كە حەشدی شەعبی لە ھۆزە عەرەبەكانی ناوچەكە پێك هاتوون.''
kdp-