د.نائیف گەرگەرى، مامۆستایێ زانینگەهێ راگەهاند، حەشدا شەعبى رابوویە ب تالانکرن و دزینا مالێن کوردان ل دەڤەرا زوممار، نوکە ژى یێ فەرمانبەر کورد بۆ دەڤەرێن عەرەبى رەوانە دکەن و عەرەبا دئێنە ناڤا زوممار دا.

(د.نائیف گەرگەرى)، مامۆستایێ زانینگەهێ، بۆ مالپەرێ فەرمیێ پارتى دیموکراتى کوردستان گۆت:" هەر ژ هاتنا حەشدا شەعبى و دەستهەلاتا ئێتحادى و هێزێن عیراقى بۆ ناڤا دەڤەرا زوممار دا دژایەتیا کوردان کر، ل دەسپێکێ رێڤەبەرێ پولیسان بۆ دەڤەرەکا عەرەبى ڤەگوهاست و ئێکێ خەلکێ دەڤەرا عیازیە ل جهێ وى دامەزراند، کۆ هێشتا عیازیە ددەستێ تیرۆرستێن داعشێ دایە".

(نائیف گەرگەرى)، پتر بەحسکر، کۆ پشتى رێڤەبەرێ پولیسان هاتیە گهورین ل زوممار، حەشدا شەعبى دەست ب تالانکرنا مال و مولکێن کوردێن دەڤەرێ کر، کۆ تا نوکە چ پێرابوونێن یاسایى ددەرهەقێ واندا نەهاتیە کرن".

ماموستایێ زانینگەهێ خویاکر:" بەرپرسێ هەوالگێریا ناحیا زوممار ب ناڤێ (رائید بەشیر گەرگەرى) ژى گهورى، جونکى شەر دژى تیرۆرستێن داعشێ کر، ئەڤە پلانە ژلایێ عەبدلرەحمان ئەللویزى دگەل حەشدا شەعبى دژى کوردان دئێتە بجهئینان ژبۆ تێکدان و تەعریبکرنا دەڤەرێ، دهەمان دەمدا 108 پولیسێن نەتەوە کورد ل زوممار بۆ دەڤەرا بەعاج هاتینە ڤەگوهاستن، داکۆ پولیسێن نەتەوە عەرەب ل دەڤەرێ ئاکنجى بکەن، لڤێرە دیار دبیت هیچ جوداهیەک دناڤبەرا حکومەتا بەعسیا ژناڤچوویى و حکومەتا نوکە یا عیراقى دا نینە، بتنێ ئارمانجا وان ژناڤبرنا کوردایە".

پشتى کەرکوک ژلایێ حەشدا شەعبى و سوپایێ عیراقێ ڤە هاتیە داگیرکرن و دەڤەرێن دەرڤەیى هەرێمێ کەفتینە دمەترسیێ دا، دەڤەرا زوممار ئێک ژ وان دەڤەران بوویە ب هەماهەنگى هاتیە رادەستکرن بۆ سوپایێ عیراقێ، بەلێ حکومەتا عیراقێ حەشدا شەعبى ژى دگەلدا ئاکنجی کر، ژبەر ڤێ ئێکێ ئەڤە بۆ جهێ دلگرانیا حکومەتا هەرێما کوردستانێ و چەپەرێن بەرەڤانیکرنێ دروستکرن، نوکە عەبدلرەحمان ئەللویزى دگەل حەشدا شەعبى یێ دژایەتیا کوردان دکەن و ژ دەڤەرێ دکەنە دەر و عەرەبا لێ ئاکنجى دکەن.
kdp-